DILI, 29 jullu 2020 (TATOLI)-Ezekutivu sira liuhosi reuniaun Konsellu Ministru (KM) aprova ona Lei Orgánika Ministériu Asuntu Parlamentár no Komunikasaun Sosiál (MAPKOMS) no Ministériu Finansa (MF) nian.
Proposta Projetu Dekretu-Lei kona-ba Lei Orgánika MAPKOMS ne’e aprezenta hosi Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo.
“MAPKOMS nu’udar departamentu governamentál ne’ebé responsável ba konsesaun, ezekusaun, koordenasaun no halo avaliasaun ba polítika ne’ebé Konsellu Ministru define no aprova ona ba área komunikasaun sosiál no ba asuntu parlamentár sira,” relata Ministru Prezidénsia Konsellu Ministru, Fidelis Manuel Leite Magalhães hafoin ramata reuniaun ezekutivu iha Palásiu Governu, kuarta ne’e.
Ministériu ida-ne’e mós iha knaar atu segura koordensaun regulár ho Parlamentu Nasionál (PN) no reprezenta Governu iha Konferénsia ba Reprezentante Bankada Parlamentár inklui iha sesaun plenária sira iha PN, bainhira mosu impedimentu hosi Primeiru-Ministru ka Ministru kompetente ba matéria auzente.
“Ministériu ne’e nu’udar responsável mós atu propoin polítika no elabora lejizlasaun no regulamentasaun nesesáriu ba área komunikasaun sosiál, ezerse superintendénsia no tutela ba órgaun komunikasaun sosiál Estadu no koordena diseminasaun ba informasaun kona-ba programa no asaun Governu nian.
Iha reuniaun ezekutivu ne’e mós, Ministru Finansas, Fernando Hanjam, aprezenta projetu Dekretu-Lei, ne’ebé Konsellu Ministru aprova ona relativa ba alterasaun dahuluk ba Dekretu-Lei númeru 28/2019, loron-25 setembru nian kona-ba Orgánika Ministériu Finansas (MF) nian.
Alterasaun ne’e integra Komisaun Nasionál Aprovizionamentu (CAN, sigla portugés) iha MF no altera nia atribuisaun sira hodi inklui realizasaun ba prosedimentu aprovizionamentu, ne’ebé haktuir orgánika foun VIII Governu Konstitusionál nian.
Ho Dekretu-Lei ida-ne’e sei halo korresaun ba denominasaun ba unidade orgánika no ba kargu diresaun no xefia sira hodi haree ba ninia uniformizasaun.
MF nu’udar departamentu governamentál ne’ebé responsável ba konsesaun, ezekusaun, koordenasaun no avaliasaun ba polítika, ne’ebé define no aprova ona hosi Konsellu Ministru ba área planeamentu no monitorizasaun anunál ba orsamentu no ba finansa públika.
Jornalista: Antónia Gusmão
Editora: Julia Chatarina
