Defensoria Públika sei loke edifísiu reprezentasaun iha munisípiu lima
DILI, 07 agostu 2020 (TATOLI)-Iha Orsamentu Jerál Estadu (OJE) tinan fiskál 2021, Defensoria Públika (DP) ajusta proposta iha planu atu estabelese edifísiu reprezentasaun iha munisípiu lima, hanesan Viqueque, Lautem, Manufahi, Ermera no Bobonaro.
Notísia Relevante : Defensoria Públika Presiza Tan Veíkulu Operasionál
Defensór Públiku Jerál, Câncio Xavier, ohin, informa, husi munisípiu hirak ne’e Ermera no Bobonaro maka konstrusaun ka instalasaun iha faze final no hein kompleta asesoria ka ekipamentu balun tanba ne’e iha tinan oin bele funsiona.
DP mós identifika ona fatin iha Same, Viqueque no Lautem, tanba ne’e tékniku sira halo hela dezeñu. Nune’e iha planu tinan 2021 bele halo konstrusaun.
Nia hateten, prioridade ba tinan oin sei halo uluk konstrusaun ba iha Munisípiu Lautem , Same no fazeadamente ba Viqueque.
“Ita hakarak abranje rezidénsia ka reprezentasaun servisu defensoria ba munisípiu ne’ebé identifikadu ho nia jeográfika populasaun ne’ebé barak hodi fasilita populasaun sira asesu servisu defensoria nian,” Câncio Xavier hateten hodi responde Agência Tatoli iha nia servisu fatin, Dili.
Câncio Xavier hateten, polítika Governu nian tuir planu estratéjiku iha sektór justisa ne’e hakarak abranje servisu defensoria ba munisípiu hotu ho objetivu atu hakbesik justisa ba sidadaun sira asesu di’ak liután.
Daudaun ne’e Defensoria Públika eziste ona iha Dili, Baucau, Covalima no Rejiaun Administrativu Espesiál Oe-cusse Ambeno (RAEOA).
Jornalista : Nelson de Sousa
Editór : Francisco Simões
