PNTL halo apreensaun ba motór-44 no karreta-rua

DILI, 17 agostu 2020 (TATOLI)-Komandu Polísia Munisípiu Dili, liuhusi Seksaun Tránzitu Dili halo apreensaun ba motór-44 no karreta privadu-rua (2) ne’ebé la kumpre regra tránzitu nian.
Notísia Relevante : Semana ne’e, asidente tráfegu rezulta vítima na’in-neen mate
Motor ho karreta privadu hirak ne’e PNTL halo apreensaun bainhira halo auto-stop iha área Metiaut, Postu Administrativu Kristu Rei, Munisípiu Dili, iha sábadu (14/08).
Komandante Seksaun Tránzitu Munisípiu Dili, Inspetór Xefe Domingos Sarmento informa, polísia halo auto-stop ba área ne’ebé nota sidadaun sira halo movimentu vizita ba fatin turizmu ne’ebé barak la kumpre regra tránzitu nian.
“Sábadu kalan, ami halo auto-stop iha área Metiaut no Área Branca haree ita nian sidadaun sira ba pasa ferias ka ba divertimentu iha ne’ebá pertensia área diskoteka, no bar iha ne’ebá barak, iha loron sesta kalan no sábadu kalan kadavés halo movimenta ita konsege foti evidénsia-46, kompostu husi karreta-rua (2) no motor-44 ne’ebé la kumpre regra,” informa Inspetór Xefe Domingos Sarmento, ba jornalista iha Komandu PNTL, Caicoli, Dili.
Atividade auto-stop ne’e envolve mós Ofisial Polísia Suku (OPS) Metiaut no Bidau Santa-Ana nian, hahú operasaun auto-stop iha tuku 1:00 to’o tuku 3:15 madrugada.
Nia hatutan, mezmu asaun auto-stop ne’e abitante balun kritika no la aseita, tanba sira hela dook, maibé PNTL implementa lei ba sidadaun sira halo movimentu ho transporte tenke uza kapasete hodi evita asidente tráfegu.
“Kalan ne’e ami identifika motorista barak mak laiha dokumentu transporte nian, no balun laiha karta kondusaun. Balun fali la uza kapasete,” nia hateten.
Transporte hirak ne’e, polisia lori kedas ba Eskuadra PNTL, Caicoli, Dili, hodi hein infratór sira foti invoice ba selu iha banku foin entrega fila fali transporte.
Komandante Seksaun Tránzitu Domingos Sarmento, apela ba abitante sira atu hatoman an lori motór tenke uza kapasete hodi evita asidente. Tanba tuir observasaun PNTL nota asidente tráfegu iha primeira semana fulan agostu 2020 rezulta vítima balun mate, tanba lori motór no karreta ho velosidade.
Polísia Dili rejista totál kazu asidente tráfegu iha primeira semana loron 1 too loron 17 agostu 2020, rezulta vítima na’in-haat (4) mate, na’in-hitu (7) kanek todan, no na’in-45 kanek kaman.
Jornalista : Eugénio Pereira
Editór : Francisco Simões

