TDD adia julgamentu ba kazu danu agravadu
DILI, 30 setembru 2020 (TATOLI)-Tribunál Distritál Dili (TDD), ohin, adia julgamentu ba kazu krime danu agravadu ida tanba juis koletivu la prienxe.
Juiza Ersília da Silva, hateten, prosesu kazu ne’e Tribunál labele realiza julgamentu ho razaun juis adjuntu ida seluk sei iha asuntu privadu. Nune’e, nia deside fila-fali julgamentu ne’e ba iha loron 5 maiu 2021, iha tuku 9:00 dadeer.
Tuir informasaun ne’ebé Agência Tatoli asesu katak prosesu refere envolve hosi arguidu na’in-neen ho inisiál JJM, AA, FS, SCF, FS no SR.
Kazu ne’e Ministériu Públiku (MP) rejistu ho númeru prosesu 0057/19.DIBCR, ba krime danu agravadu ne’ebé previstu tuir artigu 258 hosi númeru primeiru iha lei kódigu penal Timor-Leste no kazu ne’e akontese tanba arguidu sira fai kuak moru Ospitál Nasionál Guido Valadares (HNGV) nian ne’ebé hamosu prezuiju ba Estadu ho valor $1,000,00
Jornalista : Nelson de Sousa
Editór : Francisco Simões
