Sidadaun na’in-tolu ho pasaporte Xina hatán iha TDD
DILI, 20 outubru 2020 (TATOLI)-Sidadaun na’in-tolu ho pasaporte Xina nu’udar emprezáriu no negosiante tenke ba tur iha sala audiénsia julgamentu Tribunál Distritál (TDD), hodi hatán ba aktu ne’ebé deskonfia importa sasán merkadoria liuhosi portu Dili dezvia hodi la selu taxa ba Estadu.
Tuir loloos prosesu ne’e, ohin, Tribunál rona deklarasaun parte arguidu sira nian, maibé labele hala’o tanba Ministériu Públiku (MP) tuir dispozisaun legal artigu 132 Konstituisaun RDTL, lei númeru 14/2005 artigu 3 alínea d. 16 setembru, altera ba lei númeru 11/2011,28 setembru, artigu 48 no artigu 236 kódigu prosesu penál dedús akuzasaun no husu prosede iha julgamentu komún ho intervensaun Tribunál singular hasoru arguidu sira.
Tanba prosesu ne’e tama ba Tribunál dedús fali julgamentu Tribunál singular loloos dedús ba Tribunál koletivu.
Juiza Maria Solana, hateten, tanba ne’e presiza notifika fila-fali ba Tribunál koletivu hodi nune’e bele kontinua fila-fali julgamentu. Mezmu nune’e audiénsia ne’e Tribunál halo de’it identifikasaun ba arguidu sira.
Tuir informasaun ne’ebé jornalista Agência Tatoli asesu hosi parte MP prosesu ne’e rejista ho númeru nuc.0095/19.PGGCC.
Prosesu krime ne’e iha indísiu akontese iha 2019 bainhira autoridade sira hosi Alfándega halo apreensaun ba sasán merkadoria sira ne’ebé mak importa hosi nasaun Xina mai Timor-Leste liuhosi Portu, Dili.
Sasán merkadoria sira maka hetan apreensaun maka hanesan mala ki’ik (koper) ho kuantidade 20, kariña labarik nian hamutuk hitu (7), viola elétriku hamutuk 20 pcs, karreta ki’ik, layer telefone box rua, bateria telefone box ida no xinelus box neen.
Sasán sira ne’e kuandu to’o iha portu Dili, arguidu sira ho insiál XZL,WY no LXP sira hanesan nain la deklara halo loloos ka la tau sasán sira ne’e iha envoice atu nune’e bele selu taxa ba Estadu.
Arguidu sira hanesan ko-autoria materiál ba prátika krime deskaminu iha artigu 317 númeru 1 iha kódigu penal Timor-Leste.
Prosesu julgamentu ne’e, arguidu sira hetan asisténsia legal hosi advogadu privadu Januário ho defensora públika Laura Valente.
Jornalista : Nelson de Sousa
Editór : Francisco Simões
