DILI, 21 outubru 2020 (TATOLI)—Governu liuhosi Ministériu Ensinu Superiór Siénsia no Kultura (MESSK), tuir planu iha semana oin sei públika dadus kona-ba komunidade afetadu uma-kain 44 ba projetu konstrusaun Sidade Universitáriu iha Munisípiu Aileu.
Ministru Longuinhos dos Santos, hateten iha semana kotuk liubá ekipa husi MESSK nian halo tan konsultasaun ikus ho komunidade afetadu no autoridade lokál Munisípiu Aileu nune’e bele hetan ona dadus loloos atu fasilita Governu ba selu indemnizasaun iha tinan 2021.
Notísia Relevante:Governu prevee millaun $ 2.2 selu indemnizasaun ba komunidade iha Aileu
“Iha semana kotuk ita haruka tan ekipa servisu hodi ba halo tan konsultasaun dala ida ho autoridade lokál sira inklui família afetadu sira kona-ba prosesu ba oin atu apoiu indemnizasaun ba uma-ka’in 44 ne’ebé afetadu,” Governante ne’e dehan ba jornalista sira hafoin partisipa iha reuniaun Konsellu-Ministru, kuarta ne’e iha Palacio do Governo Dili.
Tuir nia publikasaun dadus ne’e atu hetan reklamasaun husi komunidade sira bainhira naran la tama iha lista indmnizasaun.
“Ita sei aprezenta rezolusaun ida ba Konsellu-Ministru hodi hetan aprovasaun kona-ba prosesu indemnizasaun ho ninia valór ne’ebé sei determina iha tempu badak,” nia hateten.
Entretantu, tuir planu husi MESSK nian iha 2021 sei hahú implementa projetu konstrusaun Sidade Universitáriu Aileu.
Notísia Relevante:Hari’i Sidade Universitáriu, MESSK aprezenta dadus ba KM
Jornalista :Tomé Amado
Editór:Agapito dos Santos
