DILI, 09 novembru 2020 (TATOLI)- Arguidu ho inisiál AA tenke ba tur iha sala audiénsia Tribunál Distritál Dili (TDD) hodi hatán ba nia aktu envolve iha atividade jogu ‘bola guling’ ne’ebé deskonfia kontra lei 06/2016 kona-ba rejime jurídiku lisensiamentu no esplorasaun tradisionál.
Kronolojia hosi kazu ne’e akontese iha Vila Verde, Dili, iha loron 8 novembru 2020, oras la apuradu, bainhira arguidu loke jogu “bola guling” iha mate uma polísia tama prende hodi kaptura ho flagante deleitu.
Arguidu kumpre ona detensaun durante oras 72 iha sela polísia no ohin, kontinua submete liuhosi julgamentu prosesu sumáriu iha TDD.
Ministériu Públiku (MP),konsidera arguidu hala’o atividade jogu ne’e laiha lisensa hosi autoridade kompetente, liu-liu Inspesaun Jerál Jogu, bazeia dekretu lei 06/2016,26 abríl kona-ba rejime jurídiku no lisensiamentu, esplorasaun no kontrola atividade jogus no mákina jogus nian.
MP akuza arguidu ho krime esplorasaun ilísitu jogu ne’ebé previstu artigu 322 iha kódigu penál Timor-Leste.
Defeza, Nelson Borges, ne’ebé fó asisténsia ba arguidu hateten, arguidu la’ós na’in ba loke jogu refere tanba momentu ne’ebá nia tur iha dalan maluk sira mak bolu hodi ba akompaña ajuda duir de’it “bola guling”
Hafoin rona tiha parte sira iha alegasaun MP husu Tribunál atu aplika pena multa ba arguidu $60.00 durante loron 60 kada loron ida selu $1.00, maibé parte defeza haree ba kondisaun ekonomia arguidu nian atu redús kustu multa ne’ebé adekuadu
Tribunál deside adia fila-fali julgamentu ne’e ba iha loron 13 novembru, tinan ne’e iha tuku 17:00 Otl, hodi rona leitura desizaun ikus.
Prosesu julgamentu ne’e prezide hosi juis singular, Albertina Neves, MP reprezenta hosi Prokuradór na’in-ida.
Jornalista : Nelson de Sousa
Editór : Francisco Simões
