2021, MJ prioritiza matéria reforma judisiária no formasaun ba autór judisiáriu
DILI, 11 novembru 2020 (TATOLI)-Ministériu Justisa (MJ) iha proposta Orsamentu Jerál Estadu (OJE) tinan fiskál 2021 kontinua tau prioridade ba reforma judisiáriu no formasaun ba autór judisiáriu foun.
“Medida setoriál ba Ministériu Justisa nian iha 2021 mak kontinua haree ba lejizlasaun matéria reforma judisiáriu nian kona-ba rejistu notariadu, lei terras propriedade, lei sektór justisa lubuk ida mak konsellu Ministru aprova ona hein atu submete mai de’it iha parlamentu hodi halo apresiasaun no prioridade boot seluk mak sei loke formasaun ba juis, prokuradór, defensór ho advogadu foun sira,” Ministru Justisa, Manuel Cárceres da Costa, informa ba Agência Tatoli, hafoin hala’o audiénsia públika hodi aprezenta proposta OJE 2021 hosi MJ nian ba Komisaun A-PN ba asuntu justisa no konstituisaun.
Nia esplika, prevee mós orsamentu iha kapitál dezenvolvimentu $550,500 hodi hadi’a moru prizaun Suai ho Gleno tanba moru besik monu ona.
Nia hatutan, MJ mós konstrui aumenta mós aula iha sentru formasaun jurídika no judisiáriu iha Caicoli tanba tinan oin sei realiza formasaun barak presiza ba autór judisiál.
Tuir dokumentu livru Planu Asaun Nasionál medida prinsipál setoriál hosi MJ ba tinan fiskál 2021 mak promove ba asesu justisa, asegura normal funsionamentu ho hadi’a servisu prizionál no reinsersaun sosiál.
MJ mós promove direitu umanu, fó kontinuidade hosi dezenvolvimentu ba kadastru nasionál iha terras no propriedade halo levantamentu no aumenta númeru parsela kadastrál iha territóriu nasionál, garante normal funsionamentu no hadi’a servisu rejistu notariadu ho identifikasaun sivíl.
Ho regulamentasaun lei, MJ mós implementa polítika jéneru, konsentra atribuisaun hotu hosi Governu iha matéria ba reforma judisiária no promove boa governasaun ho jestaun institusionál.
Hosi medida prinsipál ne’e, Ministériu Justisa iha proposta OJE 2021 prevee $15,522,678 inklui $2,067,000 ba implementasaun atividade relasiona ho medida ba planu rekuperasaun ekonómika.
Hosi montante orsamentu $15,522,678 ne’e koloka ba iha saláriu vensimentu $5,208,123, bens servisu $6,943,155 , kapitál minor $753,900, kapitál dezenvolvimentu $550,500, transferénsia públika $2,067,000.
Alokasaun orsamentál ne’ebé MJ prevee kada programa kona-ba implementasaun asesu ba justisa sei gasta $2,283,156, programa servisu prizionál no reinsersaun sosiál sei gasta $2,993,969, programa direitu umanu sei gasta $132,464, programa jestaun iha terras no propriedade sei gasta $877,128, programa rejistu, notariadu no identifikasaun sivíl sei gasta $2,640,954, programa konsolidasaun lejizlativa no judisiária sei gasta $1,425,576, programa implementasaun ba polítika jéneru sei gasta $2,830, programa boa governasaun no jestaun institusionál sei gasta $5,151,601, no programa edifísiu públiku sei gasta $15,000.
Jornalista : Nelson de Sousa
Editór : Francisco Simões
