DILI, 13 novembru 2020 (TATOLI)–Sekretaria Estadu Formasaun Profisonál no Empregu (SEFOPE) prevee orsamentu fiskál ba 2021 hamutuk $6.243.702 hodi foku ba formasaun profisionál ba juventude sira.
Husi totál orsamentu ne’e, fahe ba kategoria saláriu no vesimentu $1.708.224, bens no servisu $2.376.628, kapitál dezenvolvimentu $367.850 no transferénsia públika $1.800.000.
“Ami-nia foku iha 2021 mak formasaun profisionál no empregu, atu forma joven sira kompete iha indústria ka merkadu traballu atu redús dezempregu iha Timor-Leste,” Sekretáriu Estadu Formasaun Profisonál no Empregu, Alarico do Rosário informa sesta ne’e, iha resintu Parlamentu Nasionál (PN), hafoin audiénsia publika ho Komisaun D.
Tuir nia, formasaun profisionál no empregu ne’ebé sei realiza maka auto empregu atu apoia grupu sira ne’ebé iha kreatividade atu kria kampu traballu rasik no ba ema seluk.
“Ami sei fó prioridade mós ba sentru formasaun sira atubele hasa’e abilidade ba tékniku profisionál,” nia akresenta.
Estratéjia SEFOPE ne’ebé define iha 2021, dahuluk formasaun profisionál no reforsa kompromísiu fomasaun profisionál ba preparasaun mão de obra kualifikada hodi asesu ba empregu no dezenvolvimentu ekonómiku.
Daruak, aumenta númeru partisipante joven no adultu sira ba formasaun profisionál, inklui programa estájiu to’o graduadu husi ema 2.500 to’o 8.400
Datoluk, Promove no reforsa institusionál ba sentru formasaun profisionál sira no fomenta empregu liuhosi kriasaun empregu ba estranjeiru, empregu temporáriu no auto empregu graduadu sira.
Ikus liu, promove traballu ho kondisaun dignu iha lokál traballu inklui promove igualdade no inkluzaun.
Jornalista: Florêncio Miranda Ximenes
Editora: Julia Chatarina
