DILI, 18 novembru 2020 (TATOLI)–Polísia Sientífika Investigasaun Kriminál (PCIC) ninia ezekusaun Orsamentu Jerál Estadu (OJE) 2020 to’o daudaun ne’e atinje ona porsentu 80 (%).
Notísia Relevante : Orsamentu PCIC $1,390,253 aprova iha espesialidade
Antes ne’e Parlamentu Nasionál (PN) aprova orsamentu 2020 ba PCIC ho montante $1,390,253 hodi kobre ba saláriu vensimentu $1,133,923, bens servisu $256,330, kapitál menór, kapitál dezenvolvimentu no transferénsia públika laiha (-).
Ho aprovasaun OJE ne’e hakotu ona aplikasaun rejime Dotasaun Orsamentu Temporáriu (DOT) ne’ebé iha inísiu fulan janeiru to’o setembru 2020.
“Ezekusaun orsamentu jerál hosi PCIC daudaun atinje ona porsentu 80 ne’ebé ezekuta ba saláriu vensimentu no atividade sira seluk tan,” Diretór Nasionál PCIC, Vicente Fernandes e Brito, hateten hodi responde Agência Tatoli, ohin, iha Dili.
Nia hateten, ezekusaun orsamentu ba fulan setembru to’o mai agora seidauk la’o tanba sistema sei taka hela, maibé PCIC iha preparasaun atu halo ezekusaun ba orsamentu tanba orsamentu ne’e ninia kabementu ba planu.
“Espera iha fulan ne’e ita bele ezekuta orsamentu tuir ninia planu no atividade,” nia hateten hodi fó garantia katak orsamentu ne’e sei ezekuta durante tempu badak ho di’ak tuir kompromisu ba planu no atividade ne’ebé trasa ona, liu-liu ba viajen lokál liga ba servisu delegasaun kompeténsia ba kazu-sira.
“Prioridade dezlokasaun lokál nia kobertura iha munisípiu hotu liga ba prazu delegasaun kompeténsia ne’ebé PCIC loro-loron simu hodi ba interroga, inkéritu nune’e prova labele liu tanba maioria prosesu sira delegasaun balun lori tempu loron 60 ka 90,” Vicente Fernandes hatutan.
Jornalista : Nelson de Sousa
Editór : Francisco Simões
