Mandatu ikus, Embaixadór Aldemo Garcia despede PR Lú-Olo
DILI, 25 novembru 2020 (TATOLI)-Embaixadór Brazíl mai Timor-Leste, Aldemo Serafin Garcia, iha semana oin, termina ona nia mandatu diplomasia iha Timor-Leste. Ho nune’e, ohin, nia halo ona despedida ho Prezidente Repúblika Timor-Leste, Francisco Guterres “Lú-Olo” iha Palásiu Prezidensiál, Dili.
Notísia Relevante : Brazíl Apresia Kapasidade TL Prevene COVID-19
“Ha’u mai halo despedida ho Prezidente Lú-Olo tanba ha’u nia misaun hanesan Embaixadór Brazíl mai Timor-Leste sei termina iha semana mai ne’e,” Aldemo Serafin Garcia, informa ba jornalista-sira hafoin despede ho Prezidente Repúblika Timor-Leste.
Nia klarifika katak dezde independénsia Timor-Leste nian iha 20 maiu 2002 to’o mai ohin loron, Brazíl ho Timor-Leste hala’o kooperasaun bilateral metin tebe-tebes iha ne’ebé Brazíl implementa ona projetu por volta atus ida (100) inisiativa iha setór oi-oin através liuhosi Ajénsia Brazileira Kooperasaun (ABC-siglá portugés).
“Ha’u kontente tebes, ita konsege implementa segmentu programa prinsipál iha setór konsolidasaun Estadu,” nia hateten.
Nia hatutan, durante nia misaun iha Timor-Leste hala’o mós kooperasaun foun, hanesan ho Komisaun Anti-Korrupsaun (CAC) presta apoiu tékniku, implementar mestradu portugés iha Universidade Nasionál Timor Lorosa’e (UNTL) através akordu universidade Santa Catarinha Brazíl.
Iha mós kooperasaun ho Komisaun Funsaun Públika (CFP-sigla portugés) ba ensinu portugés iha administrasaun estatál, no kooperasaun importante-sira seluk hanesan iha area agrikultura ne’ebé empreza ida hosi Brazíl hala’o hela peskiza iha area pekuária nune’e bele dezenvolvimentu sektór refere hamutuk ho Timor-Leste inklui area-sira seluk.
Prezidente Repúblika apresia tebes kooperasaun Brazíl ho Timor-Leste nian ne’ebé metin tebes no espera katak embaixadór foun ne’ebé atu substitui Embaixadór Aldemo Garcia, kontinua aprofunda kooperasaun ba interese Estadu rua nian.
Embaixadór foun Brazíl nian mai Timor-Leste sei to’o iha Timor-Leste iha loron 14 dezembru, tinan ne’e.
Jornalista : Nelson de Sousa
Editór : Francisco Simões
