Evita problema, festa na’in bele husu ajuda PNTL fó seguransa

DILI, 30 novembru 2020 (TATOLI)- Atu evita problema ka kazu krime-sira mosu beibeik iha festa kazamentu privadu, Polísia Nasionál Timor-Leste (PNTL)  permite atu festa na’in-sira bele husu ajuda polísia nian hodi fó seguransa.

Notísia Relevante : PNTL detein suspeitu oho Ernesto dos Santos iha Taibesi

Segundu Komandante PNTL Munisípiu, Superintendente, Euclides Belo, informa asuntu ne’e relasiona ho festa kazamentu privadu ida ne’ebé hala’o iha restaurante balun iha área Kristu Rei, sábadu (28/11), mosu problema entre grupu juventude-sira ne’ebé rezulta ema balun kanek inklui sasán festa nian hanesan kadeira no meza hetan estragus.

Parte PNTL husu ba populasaun kapitál Dili atu realiza festa kazamentu iha fatin públiku, uma privadu ka salaun boot ruma, informa ba polísia bele fó susesu ba servisu PNTL lori Dili sai hosi krime no violénsia.

“Polisia prontu garante seguransa, tanba ne’e kualkér festa kazamentu privadu ne’ebé halo iha fatin públiku ruma, festa na’in-sira bele komunika mai ho karta koñesimentu ruma mai polísia hodi tau iha programa hodi fó garantia ba seguransa,” Euclides Belo hateten ba jornalista iha nia knaar fatin, ohin, iha Komandu PNTL, Caicoli, Dili.

Nia hatutan, polísia bele ba asegura kualkér festa kazamentu, importante liu maka festa na’in labele fó fali tua ba polísia, hodi polísia halo nafatin kontrolu liuhosi operasaun hodi asegura festa kazamentu hala’o to’o remata ho di’ak.

Iha parte seluk, PNTL mós sei hala’o nafatin operasaun iha estrada públiku hodi evita ema halo movimentu lori fali sasán kro’at hanesan katana, tudik, dima no rama ambon no sasán kro’at seluk tan.

“Ita halo nafatin operasaun la’o ain tama bairru no operasaun auto stop ba tipu sasán kro’at-sira ne’ebé kontra lei,” nia hateten.

Nia hatutan, ba sidadaun-sira bainhira halo viajen ba munisípiu lori sasán kro’at katana, tudik ruma tenke halo justifikasaun ba polísia hodi hatene.

Jornalista   : Eugénio Pereira

Editór        : Francisco Simões