DILI, 25 janeiru 2021 (TATOLI)-Biblioteka Sentru Formasaun Jurídika no Judisiáriu (SFJJ) iha livru jurídiku sufisiente hodi fasilita majistradu judisiál (juis), prokuradór, defensór públiku no advogadu privadu sira hodi halo leitura.
Diretór SFJJ, Antonino Gonçalves, hateten SFJJ iha biblioteka ba livru prinsipál sira kompletu hanesan kódigu penál, kódigu prosesu penál, direitu administrativu, lei violénsia doméstika, kódigu estrada, penál ba administrasaun, finansa, kódigu antolojia ho sira seluk.
Notísia Relevante : SFJJ kontinua fó formasaun komplementár ba autór judisiál
“Agora vontade fila-fali ba ema ida-idak atu mai lee hodi hariku liután sira-nia koñesimentu,” Diretór SFJJ, Antonino Gonçalves, informa ba Agéncia TATOLI, segunda ne’e iha nia kna’ar fatin Caicoli, Dili.
Nia hatutan, formasaun sira durante lao livru sira ne’e fasilita ba autór judisiál sira bele halo konsulta ka lee.
“Juiz ida atu foti desizaun tenke lee foti mós referénsia hosi autór sira seluk hodi oinsá halo maneira di’ak atu deside nune’e mós prokuradór, defensór ida ba oinsá nia maneira halo akuzasaun no fó defeza ne’ebé di’ak,’’ Antonino Gonçalves hateten
SFJJ mós sei halo kooperasaun ho parseiru internasionál balun hodi husu apoiu livru balun tan.
Jornalista : Nelson de Sousa
Editór : Francisco Simões
