DILI, 01 fevreiru 2021 (TATOLI) – Primeiru-Ministru, Taur Matan Ruak, segunda ne’e, iha Palásiu Governu, halo enkontru ho Embaixadór Korea Súl iha Timor- Leste, Kim Jeong-Ho, hodi ko’alia ligasaun enerjia eletrisidade panel solar ba illa Atauro.
“Ha’u ho Primeiru-Ministru ko’alia kona-ba eletrisidade iha Illa Atauro nian, liuliu iha instalasaun solar panel ba Atauro tanba Atauro problema eletrisidade, entaun Primeiru-Ministru husu oinsá ami bele ajuda asuntu ida ne’e,” Embaixadór Kim Jeong-Ho, informa ba jornalista hafoin enkontru ne’e.
Primeiru-Ministru Taur Matan Ruak ho Embaixadór Kim Jeong-Ho ko’alia mós asuntu dezenvolvimentu rural ne’ebé hala’o di’ak tebes hodi ajuda povu nia moris liu hosi servisu ba an rasik.
“Primeiru-Ministru husu atu programa sira ne’ebé Korea hala’o ona iha Timor -Leste tenke kontinua nafatin hodi habelar liu tan kooperasaun entre rai-rua no bele tulun povu sira iha area rural,” nia hatutan.
Iha parte seluk sira ko’alia mós kona-ba projetu ho item 11 ne’ebé mak KOICA sei hali iha Timor – Leste.
“Projetu sira ne’e ami servisu hamutuk ho KOICA no ajénsia ONU sira iha Timor- Leste. Programa sira ne’e mak hanesan iha area desportu nian mak futeból ho Taekwondo, esforsu atu haruka fali traballadór timoroan atu ba servisu nafatin iha Korea bainhira Covid-19 menus ona, hahán nutrisaun di’ak ba labarik sira iha eskola, kria empregu ba joven sira iha area rural, iha mós area saúde prevensaun ba moras TBC no seluk tan,” nia hateten.
Jornalista : Hortencio Sanchez
Editór : Francisco Simões
