AIFAESA destroi sigaru palet 117 ne’ebé liu prazu
DILI, 05 fevereiru 2021 (TATOLI)—Diretór Operasaun Autoridade no Fisklaizasaun Atividade Ekonómika no Sanitaria (AFAIESA), Gabriel da Costa, agradese ba Kompañia Distribuidór Lixu nian tanba sira hakarak servisu hamutuk ho Governu liuliu AIFESA hodi kontribu atu halo destruisaun ba sira-nia sasán ka produtu sira-ne’ebé liu ona prazu.
Notísia Relevante: AIFAESA Halo Destruisaun ba Sigaru Masu 6.240 no Produtu Liu Prazu Hamutuk 7.823
Gabriel da Costa hatutan, sasán hirak ne’ebé mak liu ona prazu mak hanesan bebidas, biscuit, pop mie, mina bimoli, hahan kmaan labarik sira-nian, sigaru ho nia totál palet hamutuk 117 ne’ebé hosi 1.509 palet mak kompañia sira husu AIFAESA hodi halo destruisaun ba sira-nia produtu sira-ne’e.
“Ita agradese tanba sira bele kontribui servisu hamutuk hodi destroi sira-nia sasán ne’ebé mak liu ona prazu no aat daudaun ona. Sasán hirak ne’ebé mak liu ona prazu, nia informa, mak hanesan bebidas, biscuit, pop mie, mina bimoli, hahan kmaan labarik sira-nian, sigaru ho nia totál palet hamutuk 117 ne’ebé hosi 1.509 palet mak kompañia sira husu AIFAESA hodi halo destruisaun ba sira-nia produtu sira-ne’e,” Gabriel da Costa hateten bainhira ekipa AIFAESA destroi sasán liu ona prazu sira iha Tibar, Liquiça, sesta ne’e.
Nia hateten, planu AIFAESA ne’ebé foin dadauk halo distribuisaun ba sasán sira-ne’e hosi Kompañia Distribuidór Lixu hodi halo destruisaun ba produtu sira ne’ebé besik liu prazu no komesa atu aat daudaun ona.
“Durante ne’e, Kompañia Distribuidór Lixu mak haruka karta kona-ba sira-nia sasán ne’ebé mak liu ona prazu mai ami hodi halo destruisaun. Tanba ne’e, AIFAESA fasilita sira para halo koordenasaun entre autoridade lokál inklui ho seguransa sira mak ohin ita realiza destruisaun ba sasán liu ona prazu ne’e,” nia hateten.
Iha fatin destroi sasán liu ona prazu ne’e, Agência TATOLI observa katak komunidade maioria mak hakbesik ba sasán no foti hodi konsumu maske sira hatene katak sasán sira-ne’e liu ona prazu no la merese ona atu konsumu.
Jornalista: Osória Marques
Editór: Cancio Ximenes
