DILI, 05 marsu 2021(TATOLI)—Prezidente Repúblika, Francisco Guterres Lú Olo, apresia esforsu koletivu hosi Organização Popular da Mulher Timor (OPMT-sigla portugés) no Comissão de Pesquisa e Elaboração da História da Luta da Mulher Timor ba produsaun livru Buibere Hamriik Ukun Rasik An.
Notísia Relevante: PR Lú Olo sei lansa livru “Buibere Hamriik Ukun Rasik-An”
“Livru ne’e, hatudu istória koletiva ema barak nian, la’ós individu ka grupu ida-nian, maibé koletiva nian hodi refleta papél feto nu’udar protagonista iha luta libertasaun nasionál,” Prezidente Repúblika, Francisco Guterres Lú Olo, hateten liuhosi komunikadu imprensa ne’ebé Agência TATOLI asesu hosi Palásiu Prezidente Nicolau Lobato, Bairru Píite, Dili, sesta ne’e.
Prezidente Repúblika hateten, livru “Buibere Hamriik Ukun Rasik-An” ne’e nu’udar sasin kona-ba partisipasaun feto iha luta libertasaun nasionál no hatudu katak liberdade hetan ho folin aas tebes.
“Tanba ne’e foinsa’e tenke hatene asume no transmite valór no prinsípiu sira ba luta libertasaun nasionál,” Prezidente Repúblika hateten.
Livru ho títulu “Buibere Hamriik Ukun Rasik An” ne’e sei lansa hosi Prezidente Repúblika iha Loron Feto Internasionál, 8 marsu 2021, iha Palásiu Prezidensiál Nicolau Lobato Bairru Píte, Dili, tuku 16.00 lorokraik.
Entretantu, Sekretária Jerál OPMT, Lourdes Maria Alves Araújo, agradese ba líder nasionál hotu-hotu nia apoiu hodi bele realiza peskiza no prodús obra ida-ne’e no husu deskulpa ba atrazu iha prosesu produsaun tanba fatór oioin.
Nai dehan, iha agostu 2010, OPMT ho apoiu hosi lideransa nasionál hotu-hotu hala’o angariasaun fundu ba projetu hakerek livru partisipasaun feto iha luta libertasaun nasionál.
“Husi osan angariasaun fundu ne’ebé apoiu hosi Governu, OPMT harii Comissão de Pesquisa e Elaboração da História da Luta da Mulher Timor hodi halibur dadus kona-ba feto-nia partisipasaun iha luta hasoru okupasaun Indonézia hosi fonte feto no mane liu ema na’in-800 hosi munisípiu 12 inklui Rejiaun Administrtaivu Espesiál Óe-Cusse Ambeno (RAEOA),” nia informa.
Tuir nia, bainhira atu hakerek livru refere, Comissão de Pesquisa e Elaboração da História da Luta da Mulher Timor halo rekrutamentu ba peskizadór no hakerek na’in sira ba produsaun livru Buibere Hamriik Ukun Rasik-An.
Notísia Relevante: OPMT selebra loron veteranu ho espozisaun livru “Buibere Hamriik Ukun Rasik-An”
4 Setembru, Xefe Estadu Lansa Livru ‘Buibere Hamriik Ukun Rasik-Aan’
Jornalista: Osória Marques
Editór: Cancio Ximenes
