Deputadu sira sei aprova rezolusaun regula funsionamentu PN iha serka sanitária

DILI, 19 marsu 2021 (TATOLI)—Deputadu sira sei aprova rezolusaun ida hodi regula funsionamentu Parlamentu Nasionál iha aplikasaun vijénsia serka sanitária no konfinamentu obrigatóriu.
Projetu-rezolusaun ne’e propoin hosi deputadu sira hosi bankada Frente Revolusionária Timor-Leste Independente (FRETILIN) ne’e sei diskute no aprova iha segunda-feira.
“Bankada FRETILIN mak propoin atu bele halo rezolusaun ida ne’ebé mak sei regula kona-ba funsionamentu parlamentu durante serka sanitária no konfinamentu obrigatóriu,” Sekretária Meza Parlamentu Nasionál, Deputada Lídia Norberta dos Santos Martins, ko’alia iha uma fukun, sesta ne’e.
Nia hatutan, projetu-rezolusaun ne’e apoia mós bankada Congresso Nacional de Reconstrução de Timorense (CNRT) no bankada Partidu Demokrátiku (PD).
“Bankada sira seluk mós fó apoiu ba ida-ne’e katak maske serka sanitária maibé Parlamentu Nasionál labele para. Entaun segunda agora sei iha rezolusaun ida kona-ba asuntu ida-ne’e hodi intensifika servisu komisaun no mós plenária nian,” nia dehan.
Entretantu Prezidente Parlamentu Nasionál, Derputadu Aniceto Longuinhos Guterres Lopes, hateten reuniaun plenária sei realiza kada semana dala-ida iha serka sanitária ne’e.
“Durante serka sanitária, semana ida plenária dala-ida, komisaun espesializada sira funsiona nafatin. Maibé, kondisaun parlamentu nian liuliu atu garante espasu atu garante distansiamentu sosiál la permite tanba ne’e iha limitasaun maibé tenke kumpre nafatin regra protokolu COVID-19 ninian,” nia hateten.
Maibé, nia haktuir, komisaun espesializada permanente sira kontinua diskute insiativa lejizlativa sira-ne’ebé oras ne’e iha komisaun ida-idak.
Jornalista: Evaristo Soares Martins
Editór: Cancio Ximenes

