COVID-19, F-FDTL labele halo rekrutamentu dala ida de’it
DILI, 24 marsu 2021 (TATOLI)-Ho situasaun pandemia COVID-19 no tanba mós kestaun orsamentu, Komandu FALINTIL-Forsa Defeza Timor-Leste (F-FDTL) labele halo rekrutamentu dala ida de’it ba membru foun 600. Tanba ne’e, F-FDTL sei hahú uluk rekrutamentu ba na’in-300.
Notísia Relevante : Komandu F-FDTL sei rekruta membru F-FDTL foun 600 iha 2021
Lia hirak ne’e hato’o hosi Xefe Estadu Maiór Jenerál F-FDTL, Tenente Jenerál Lere Anan Timur, ba jornalista sira, kuarta ne’e, hafoin halo enkontru semanál ho Prezidente Repúblika, Francisco Guterres “Lú Olo” iha Palásiu Prezidensiál, Dili.
Notísia Relevante : Lere husu MD ezekuta ona OJE 2021 hodi rekruta membru foun F-FDTL
“Planu rekrutamentu membru foun na’in-600, maibé ho situasaun pandemia COVID-19 no orsamentu, labele hala’o dala ida tanba ne’e sei halo uluk de’it rekrutamentu ba membru kandidatu efetivu foun na’in-300 hahú iha abríl ka maiu, tinan ne’e,” Lere Anan Timur hateten.
Lere Anan Timur, tenik bainhira iha desizaun polítika hosi Governu, tinan ne’e nia laran, bele kontinua rekruta tan iha etapa tuir mai ba membru na’in-300 hodi kompleta númeru membru foun na’in-600.
Jornalista : Nelson de Sousa
Editór : Francisco Simões
