DILI, 01 abril 2021 (TATOLI)—Kinta-feira santa nu’udár loron dahuluk ba tridun paskua ninian, tanba ne’e iha loron ne’e sai hanesan konvite ida ba sarani sira hotu atu ida-idak hanoin fila-fali ba hahalok sira-ne’ebé halo ona durante ne’e.
Arsebispu Arkidioseze Metropolitana Dili, Don Virgílio do Carmo da Silva, hateten iha kinta-feira santa ne’e Jesus Kristu hatudu moris foun no domin ba rai-klaran liuhosi fase eskolante sira-nia ain.
Notísia Relevante: Domingu Ramos loke dalan ba semana santa
“Loron ohin ita hahú daudaun tridun paskua ninian. Iha loron ida-ne’e, Ita Nai Jesus Kristu hanorin mai ita liafuan domin, hahalok, atu nune’e iha loron dahuluk ida-ne’e, ita kontempla kona-ba ninia domin tanba ninia domin aban (sesta-feira santa) ita sei haree iha kalváriu. Jesus hatene, loron to’o ona Maromak atu hahí Jesus liuhosi nia terus no mate iha kalváriu, tanba iha ne’ebá mak Maromak hatudu ninia domin Maromak loloos ba ema,” Don Virgílio do Carmo da Silva hateten liuhosi nian ómilia iha selebrasaun kinta-feira santa iha Igreja Maria Imaculada Conseição, Katedral Dili, kinta ne’e.
Arsebispu ne’e hateten, Jesus fase eskolante sira-nia ain, ida ne’e mak lisaun ikus ne’ebé nai Jesus Kristu hosik hela tradisaun ida ba sarani sira atu hanoin kona-ba hahalok importante ida-ne’e iha Jesus nia moris.
“Hanesan nia dehan, maske ha’u imi-nia mestre no ha’u tenke fase imi ain, ne’eduni imi mós sei halo hanesan ne’e ba malu. Imi sei banati tuir nu’udár ha’u foin halo ba imi,” Don Virgílio haktuir.
Tanba, amu bispu ne’e dehan, Jesus nia moris la’ós ho laifuan de’it maibé Nia hatudu jestu ida-ne’ebé partikular tanba molok festa paskua Nai Jesus hatene loos katak to’o ona nia loron atu husik daudaun raiklaran atu liu ba Nia Aman. Tanba ne’e, oinsá atu haburas loron dahuluk tridun paskál ninian ne’e, husu sarani sira atu akompaña no komprende didi’ak Jesus fó-aan tomak simu terus to’o kalváriu.
“Iha kalváriu mak Jesus fó domin ba ita laiha limitasaun no Nia la hein mós atu ema seluk halo fali ba nia. Tanba jestu fase eskolante sira-nia ain ne’e, la’os simplesmente hatudu kona-ba Maromak nia umilidade. Jesus ne’ebé haraik-aan no ida-ne’e revela Jesus Nia identidade. Maromak loos mak ida-ne’e, ida-ne’ebé hatene serví,” nia dehan.
Don Virgílio hateten, loron Jesus hatudu nia domin ne’ebé ba nia ema sira laiha sukat, tanba Jesus habadak ninia atividade tomak ne’eb’e nia halo durante nia moris, ho verbu ida de’it mak “Amar” ka “hadomi”.
“Jesus nia moris tomak, hadomi hanesan liafuan ne’ebé frekuentemente iha biblia hatudu mai ita katak Maromak nia domin ne’e laiha rohan, la’os tanba interese, maibé domin ne’ebé Nia fó ba ita tanba ema presiza no hein duni ne’ebé laiha rohan,” nia dehan.
Bispu haktuir, Jesus hatudu nia domin ba ema la haree ba ida-ne’ebé mak boot no kiik maibé Nia trata ema hotu hanesan.
“Ne’e hanorin mai ita banihira ita atu hadomi ita-nia maluk tanba hadomi maibé la’ós tanba interese ba buat ruma. Tanba interese ne’e la’ós domin. Liuliu loron ida-ne’e, loron domin Ita Nai Jesus Kristu hatudu nia domin ne’e, konvida ita mós sukat no koko ita-nia domin, oinsá hadomi labele tanba interese buat ruma,” nia haklaken.
Don Virgílio esplika, ida-ne’ebé hatene serví, domin fó laiha rezerva no ida-ne’e mak natureza dignidade loloos ema-ida nian hodi la’o tuir Jesus Kristu nia hanorin no hahalok.
“Bainhira ita komprende ida-ne’e mak Jesus dehan; rahun di’ak duni ba ó bainhira ó bele moris tuir didi’ak identidade loos Jesus Kristu ninian iha ó-nia moris. Bainhira ó bele revela Jesus Kristu nia identidade iha ó-nia moris mak ó bele sai eskolante ne’ebé loos,” nia dehan.
Jornalista: Arminda Fonseca
Editór: Cancio Ximenes
