DILI, 06 abríl 2021 (TATOLI)—Bankada Congresso Nacional Reconstrução de Timorense (CNRT) husu VIII Governu Konstitusionál lideradu Primeiru-Ministru (PM) Taur Matan Ruak, uza rekursu no meiu hotu-hotu atu atua COVID-19, dezastre naturál, resesaun ekonómika no povu barak mak hamlaha iha aplikasaun serka sanitária no konfinamentu obrigatóriu ne’e.
Notísia Relevante: PN aprova votu pezár ba vítima dezastre naturál
“Estadu agora iha situasaun grave hanesan ameasa COVID-19, resesaun ekonómika, povu hamlaha, inundasaun no ema mate. Nune’e Bankada CNRT husu ba Governu atu uza rekursu no meiu hotu-hotu ne’ebé iha hodi responde ba situasaun povu nian ne’ebé oras ne’e hasoru no buka lalais solusaun ba ekonomia ne’ebé hakdasak ba beibeik, liuliu responde lalais ba vítima dezastre naturál sira,” Reprezentante Bankada CNRT, Deputadu Leandro Lobato, levanta asuntu ne’e liuhosi plenária, tersa ne’e.
Bankada CNRT hare’e katak, Governu atuál foka liubá kestaun COVID-19 ka bele dehan sofre paranóia ba COVID-19 ho aproximasaun dadus rai-li’ur nian, no abandona tiha nia responsabilidade ba kestaun sira seluk inklui posibilidade ba dezastre naturál ne’ebé bele mosu hodi estraga rai no povu.
Nune’e mós iha loron 28 marsu 2021, nia dehan, Dirasaun Nasionál Meteorolojia no Jeofízika alerta ona katak sei mosu mosaun iha fin marsu no inísiu abríl maibé Governu laiha planu no estratéjia hodi antesipa.
Relasaun ho situasaun hirak ne’e, Bankada CNRT husu ba Governu atu loke fila-fali sentru negósiu no komersiál sira, atu nune’e roda ekonomia bele la’o hikas, povu bele fila-liman, oportunidade ba kampu traballu hosi setór privadu sira.
Bankada CNRT husu Governu kontinua aplika medida rigorozu kona-ba protokolu no regra Organizasaun Saúde Mundiál hodi prevene no kombate pandemia Covid-19.
Iha deklarasaun polítika ne’e husu atu sentru kuarentena no izolamentu tenke funsiona, labele admite halo konsentrasaun ema barak ne’ebé bele provoka alargamentu transmisaun komunitáriu.
Bankada CNRT husu Governu interven lalais harii hikas infraestrutura bázika, harii fali povu nia uma kauza hosi dezastre naturál, fornese subsídiu ba vítima sira atu rekupera moris, asisténsia rekuperasaun trauma, normaliza hikas ponte no estrada sira-ne’ebé liga entre munisípiu no kapitál.
Bankada CNRT husu Governu garante hahan ba povu tomak dentru fulan neen (6) to’o tinan-ida hodi evita Timoroan mate no má-nutrisaun tanba hamlaha.
Jornalista: Evaristo Soares Martins
Editór: Cancio Ximenes
