DILI, 07 abríl 2021 (TATOLI)—Empreza nasionál Atramor&RayaTex kontinua distribui ajuda umanitária ba abitante-sira vítima dezastre naturál ne’ebé maka evakua ba João Paulo II, Tasi-Tolu, Dili.
Notísia Relevante : Raul Lemos apoiu nesesidade báziku ba komunidade afetadu dezastre naturál
Na’in ba empreza Atramor&RayaTax, Raul Lemos hamutuk ho nia ekipa, kuarta (07/04), tuku 15:00 Otl, lori apoiu nesesidade báziku, hanesan foos saka 100, supermi dos 100, sabonete dos 10 eskova kose-nehan dos 10 no susu-ben Enaak dos 10, distribui diretamente ba abitante afetadu dezastre naturál ne’ebé evakua ba iha João Paulo II, Tasi-Tolu, Dili.
Raul Lemos hateten, nia ho nia família sinseru fó apoiu umanitária ba abitante sira ne’ebé afetadu hosi dezastre naturál, maske apoiu ne’e nia kuantidade folin-laek.
“Ami apoia ho laran-luak. Ami hakarak ajuda halo kaman ita-nia maun-alin, inan-feton, inan-aman no ita-nia oan sira ne’ebé sofre liu ita iha dezastre naturál ne’e,” hateten Raul Lemos, ba Agência Tatoli iha ámbitu distribui apoia umanitária ba abitante afetadu dezastre naturál ne’ebé evakua ba iha João Paulo II, Tasi-Tolu, Dili.
Koordenadór abitante sira afetadu dezastre naturál ne’ebé evakua ba João Paulo II, Filomeno de Araújo, hato’o sira-nia agradesimentu ba Raul Lemos ho nia-família ne’ebé lori ona apoiu ai-han no nesesidade báziku sira seluk atu bele hakmaan sira nia taterus hodi aguenta iha tempu ida difisil tebes ho situasaun dezastre natural ne’e.
Molok ne’e, iha loron 06 abríl 2021, Raul Lemos, lori nia família rasik nia naran ho nia empreza Atramor&RayaTax, entrega mós apoiu nesesidade báziku liuhosi Sekretária Estadu Protesaun Sivíl (SEPS) hodi bele tulun komunidade afetadu dezastre naturál iha territóriu nasionál.
Apoiu ne’e, Krisdayanti, Diva Pop Indonézia nia marido ne’e entrega direitamente ba Sekretáriu Estadu SEPS, Joaquim Gusmão, iha edifísiu SEPS, Caicoli, Dili.
Sasán sira ne’ebé maka Raul Lemos entrega ba Governu liuhosi SEPS maka hanesan foos saka 100, susu-ben enak ho dos 20, kafé Timor kilograma 100, masin-midar ho kilograma 25, masin dapur nian dos 10, mina Bimoli 2 litru ho kuantidade 100 (botol), pastadente ho dos 10, eskova kose-nehan dos 10, sabaun Nuvo dos 10.
Raul Lemos entrega mós máskara dos ualu (8) korresponde ho kuantidade 4.800 pcs, roupa jas feto kuantidade 100 pcs, dres-bluse feto kuantidade 120 pcs, kamiza labarik mane kuantidade 180 pcs, kamiza mane ba ema adultu kuantidade 120 pcs, ho roupa feto ba ema adultu kuantidade 71 pcs.
Jornalista : Eugénio Pereira
Editór : Francisco Simões
