DILI, 13 abril 2021 (TATOLI)—Administradór Postu Administrativu Dom Aleixo, Tomas Barros, hateten Pastu Administrativu Dom Aleixo halo levantamentu dadus no rejistu vitíma dezastre naturál sira-ne’ebé afetadu ba inundasaun atinje ona 80%.
“Dadus afetadu inundasaun ne’ebé autoridade komunitária sira rekolla atinje ona 80%. Ne’e sei dadus provizóriu hela,” Tomas Barros hateten ba jornalista TATOLI, liuhosi telefónika, segunda ne’e.
Tuir nia, dadus provizóriu hosi suku hitu hamutuk 7.238 kompostu hosi Suku Bairru Pite iha 654 ne’e ba formatu lista inundasaun no formatu daruak ba infraestrutura seidauk tama, Bebonuk ho formatu dahuluk 374 no formatu daruak 17, Kampung Alor ho formatu dahuluk 1.330 no formatu daruak 50, Comoro 3.074 no formatu daruak nian 13, Fatuhada 850 xefe família no estragu 17, Madohi iha 317 no formatu daruak seidauk tama no Suku Manleuana 146 no dadus estragu seidauk tama.
“Ho lista provizóriu ne’e nu’udar Administradór Postu apela ba autoridade komunitária liuliu xefe aldeia sira tanba sira mak sai autór úniku ne’ebé hakbesik populasaun hodi rekolla dadus afetadu iha terrenu. Ha’u husu atu ita-boot sira tenke aselera levantamentu dadus ne’e para aban submete ona ba Governu sentrál hodi hein prosesu tuir mai,” nia apela.
Pastu Administrativu Dom Aleixo iha Suku Hitu, Aldeia 72, ho totál xefe família hamutuk 31.608 no totál populasaun hamutuk 168.000.
Jornalista: Osória Marques
Editór: Cancio Ximenes
