DILI, 12 abríl 2021 (TATOLI)—Líder Nasionál, Kay Rala Xanana Gusmâo, fó orientasaun ba membru Polísia Nasionál Timor-Leste (PNTL) atu haruka juventude sira-ne’ebé halo asaun protesta durante loron tomak iha área besik sala Izolamentu Vera Cruz, Dili, atu fila ba sira-ida-idak nia hela fatin.
Notísia Relevate: La entrega mate-isin, Xanana deside toba iha sentru izolamentu
Xanana Gusmão orienta membru Polísia Nasionál Timor-Leste sira ne’e, atu hateten ba juventude sira fila ona ba ida-idak nia horik fatin atu deskansa, tanba rai kalan ba daudaun ona no bele fila-fali mai iha aban dadeersan.
“Ba haruka joven sira fila ona tanba kalan ona. Ba deskansa. Aban mak mai fali,” Xanana Gusmão orienta membru PNTL sira ne’ebé halo seguransa iha sala Izolamentu Vera Cruz, segunda kalan ne’e.
Maske membru polísia sira esforsu haruk juventude sira-ne’e fila ba sira-nia uma, maibé joven sira kuaze 200-resin ne’e kontinua hakilar “Viva Xanana Gusmão!” hodi hamriik metin no lakohi book-aan atu fila ba ida-idak nia uma.
“Avo Nana sai hosi ne’e mak ami fila,” joven sira-ne’e hakilar hodi fó resposta ba membru PNTL sira.
Maske nune’e, karik juventude sira-ne’e ulun bele moruk maibé hosi parte PNTL konsege haruka joven hirak ne’e fila ba sira ida-idak nia uma bazea ba orientasaun hosi Xanana Gusmão.
Molok fó orientasaun ba membru polísia sira atu haruka joven sira-ne’e fila ba uma, Xanana Gusmão hamutuk ho sarani balun hasa’e orasaun ba Aman Lalehan iha Igreja (protestante) Evangelica Presbiteriana Ebezer, Vera Cruz, Dili, ne’ebé dirije hosi Padre Ângelo Salsinha.
Maske nune’e, Xanana Gusmão dehan mate-isin sai hosi fatin Izolamentu Vera Cruz ne’e tenke família mak haloot la’ós ba haloot fali iha Metinaro.
“Lae, ita iha-ne’e to’o semana ida,” Xanana hateten.
Tuir observasaun, iha kalan ne’e, doutór sira esforsu-aan fó hanoin ba Xanana Gusmão kona-ba kronolojia matebian Armindo Borges nia kondisaun, maibé Xanana Gusmão lakohi atu rona no rona.
Entretantu, situasaun atuál oras ne’e hakmatek tanba joven sira-ne’ebé fó solidariedade ba Xanana Gusmão hahú fila ona ba sira-nia horik fatin no parte PNTL kontinua asegura sala Izolamentu Vera Cruz to’o ohin loron.
Observasaun seluk ne’ebé Agência TATOLI nota katak, maske malirin no rai-rahun ua’in, Eis Primeiru-Ministru Xanana Gusmão hahú prepara biti no sumasu atu toba no toba duni iha portaun sala Izolamentu Vera Cruz nia oin.
“Ha’u toba de’it iha-ne’e,” Xanana hateten molok atu toba.
Jornalista: Evaristo Soares Martins
Editór: Cancio Ximenes
