DILI, 13 abríl 2021 (TATOLI)-FALINTIL-Forsa Defeza Timor-Leste (F-FDTL) kontinua fó asisténsia ba família afetadu dezastre naturál iha Lagoa Tasi-Tolu to’o iha loron 17 abríl, tinan ne’e.
Notísia Relevante : F-FDTL monta kuzina movel iha Tasi-Tolu
Dezastre naturál ne’ebé akontese iha loron 04 abríl, mosu inundasaun ne’ebé akontese iha Dili no territóriu hodi estraga komunidade nia sasán, uma no balun lakon vida.
Iha tersa ne’e, Xefe Ekipa F-FDTL, Tenente Koronél, Constantino Moreira, hala’o enkontru koordenasaun ho liña ministerial hanesan Sekretáriu Estadu Protesaun Sivíl (SEPS), Ministériu Administrasaun Estatál (MAE) ho Ministériu Agrikultura (MAP) hodi partilla servisu sira durante hala’o iha Tasi-Tolu.
Diretór Jerál Sekretáriu Estadu Protesaun Sivíl (SEPS), Asistente Polísia, Ismael Babo, hateten rekursu protesaun sivíl limitadu, nune’e SEPS hato’o pedidu ba Ministériu Defeza ho Xefe Estadu Maiór Jenerál F-FDTL, Tenente Jenerál, Lere Anan Timur, hodi apoiu no koloka membru F-FDTL fó asisténsia ba vítima dezastre naturál iha Lagoa Tasi-Tolu, Dili.
“Tuir despaxu ne’ebé iha servisu F-FDTL sei la’o durante semana ida iha Tasi-Tolu no sei hotu iha loron 17 abríl tinan ne’e, tanba ne’e ho enkontru atu bele ko’alia koordenasaun molok entrega servisu sira,” Diretór Jerál SEPS, Ismael Babo hateten ba jornalista sira iha Tasi-Tolu, Dili, tersa ne’e.
Liuhosi enkontru ne’e, parte sira diskute mós mekanizmu kooperasaun bainhira misaun F-FDTL termina ba oin oinsá servisu sira ne’ebé F-FDTL hala’o liña ministeriál kontinua nafatin hodi atende komunidade sira.
Iha biban ne’e, Diretór Jerál MAP, Fernando Amaral, hateten MAP disponibiliza nafatin ai-han lokál ne’ebé nutritivu hodi fornese ba iha família afetadu sira.
Jornalista : Nelson de Sousa
Editór : Francisco Simões
