DILI, 21 abríl 2021 (TATOLI) – Diresaun Rekursu Umanu (DRH, sigla portugés), Ministériu Edukasaun Juventude no Desportu (MEJD) halo hela preparasaun atu bele aselera prosesu rekrutamentu ba profesór na’in-975.
Notísia Relevante : MEJD sei rekruta tan profesór na’in-975
Diretora DRH-MEJD, Marcelina Liu, informa preparasaun tékniku ne’e la’o hela no hein hela despaixu hosi Ministru Edukasaun Juventude no Desportu (MEJD), Armindo Maia.
“Ami halo ona preparasaun sira hotu ba dokumentu rekrutamentu nian, bainhira iha ona despaixu hosi Ministru Edukasaun Juventude no Desportu, ami sei aselera prosesu ne’e hodi anunsia konkursu ne’e ba públiku,” Marcelina Liu haktuir ba Agência Tatoli iha nia servisu fatin, Vila Verde, Dili, kuarta ne’e.
MEJD liuhosi DRH halo mós prosesu pensaun ba profesór reforma na’in-169 no nia rezultadu sei haruka ba Komisaun Funsaun Públiku atu prosesa no submete ba Ministériu Solidariedade Sosiál no Inkluzaun (MSSI).
“Ami prosesa ona pensaun ba profesór na’in-169, kompostu hosi na’in-19 hosi Aileu, Ainaro (1), Baucau (25), Bobonaro (40), Covalima (14) no Dili na’in-70 ,” Marcelina Liu informa.
Marcelina Liu akresenta katak profesór-sira ne’ebé mak tama kategoria mate, reforma no invalidés tuir dadus hamutuk na’in-1.015 no sira ne’ebé mak prepara-an atu tama ba idade reforma iha na’in-1.484.
Dadus 1.015 husi profesores sira ne’ebé mak kategoria mate, reforma no invalidés ne’e haruka ona bá Komisaun Funsaun Públiku para família sobrevivénsia bele hetan mós nia direitu ba seguransa sosiál.
“Profesór-sira ka funsionáriu ne’ebé mak reforma ka invalidés, na’in rasik sei simu ninia direitu, maibé kuandu mate ona nia fen ka oan ne’ebé menoridade mak simu to’o nia idade tinan 17,” Marcelina Liu esplika.
Jornalista : Tomé Amado
Editór : Francisco Simões
