DILI, 28 abríl 2021 (TATOLI)—Bankada Partidu Demokrátiku (PD) husu Governu labele haterus povu iha medida foun ne’ebé sei mai iha ámbitu estensaun estadu emerjénsia ba dala-XIII.
Xefe Bankada Partidu Demokrátiku (PD), Deputadu António da Conceição ‘Kalohan’ apela ba Timor-oan hotu tau esforsu hamutuk ba nasaun hodi salva povu iha vijénsia COVID-19 no husik tiha kontestasaun sira.
“Ami husu, ita la’ós hola medida sira-ne’e tanba ita atu halo terus tán ita-nia povu, ita hola medida sira-ne’e atu salva ita-nia povu tanba ne’e tenke iha mós atuasaun ne’ebé mak rigór ho responsabilidade hosi governante sira,” Xefe Bankada PD ne’e levanta iha estensaun estadu emerjénsia ba dala-XIII, iha uma fukun, kuarta ne’e.
Bankada PD nia espetativa mak surtu COVID-19 sai ona episentru entaun blokea Dili no blokea mós munisípiu sira.
Nia relembra, durante tinan 24 Timor-oan sira bele rejiste, entaun rejiste fulan ida hodi salva uluk povu, la presiza uza argumentu hotu-hotu kona-ba Liberdade tanba sasukat mak nia uma tatís ne’e iha daudaun ema mate.
Tanba ne’e, presiza blokea Dili no munisípiu sira nune’e hapara kontaktu sira-ne’ebé durante ne’e la’o hela.
Bankada PD nia deklarasaun ne’e hato’o iha ámbitu revovasaun deklarasaun estadu emerjénsia ba dala-XIII iha Parlamentu Nasionál tanba aplikasaun durante ne’e povu barak mak enfrenta hamlaha iha serka sanitaria no konfimamentu obrigatóriu.
Tanba, medida ne’ebé Governu sei hasai bazeia lei autorizasaun renovasaun deklarasaun estadu emerjénsia ne’ebé Parlamentu Nasionál aprova.
Governu iha kompeténsia atu hola medida ne’ebé rigoroza durante vijénsia COVID-19 maibé tenke prepara kondisaun ba povu, katak fós ne’ebé iha Sentru Lojístika Nasionál (CLN-sigla portugés) tenke distribui ba populasaun bainhira presiza hahaan.
Xefe Bankada PD ne’e mós propoin atu integra personalidade sira-ne’ebé iha influénsia iha Timor-Leste iha prevensaun no kombate hasoru moras invizivel ne’e.
Jornalista: Evaristo Soares Martins
Editór: Cancio Ximenes
