LIQUIÇA, 03 maiu 2021 (TATOLI) – Negosiante liu ema-80, daudaun ne’e, laran susar tanba sira la hetan ona rendimentu hodi bele garante ba sira atu kumpre obrigasaun atu devolve Banku nia osan ne’ebé sira foti hanesan baze ba sira halo negósiu.
Negosiante 80-resin iha Leorema, foti osan iha banku hanesan Banku Nasional Komérsiu Timor-Leste (BNCTL) no kooperativa sira hanesan Tuba Rai Metin, Moris Rasik ho seluk tan. Ne’ebé iha nia regra rasik bainhira ema ne’ebé foti osan ba halo negósiu maka pelumenus kada semana ka kada fulan tenke hatama ka store osan to’o tempu termina. Maibé ho serka sanitária ne’e, negosiante hirak ne’e la hetan rendimentu atu kumpre sira-nia obrigasaun ba banku ka instituisaun finanseira hirak ne’e.
Xefe Suku Leorema, Postu Administrativu Bazartete, Munisipiu Liquiça, Sandra de Araújo hateten, daudaun ne’e nia komunidade hamutuk 80-resin mak kréditu ka foti osan iha banku maibé tanba serka sanitária no estadu emerjénsia halo produtu lafolin nune’e labele halo pagamentu ba banku ne’ebé sira foti osan halo negósiu.
“Situasaun agora difisil tebes ba komunidade iha Leorema ne’e. Liu-liu sira ne’ebé iha dividas iha banku. Kada semana ema sempre mai tuir sira hodi hatama osan, maibé produtu lokál ne’ebé sira fa’an ema la sosa entaun sira la hetan rendimentu,” Xefe Suku Leorema, Sandra de Araújo informa ba Agência Tatoli iha Liquiça, segunda ne’e.
Nia hateten, negósiu ki’ik ne’ebé komunidade loke obrigadu tenke taka total no komunidade balu nia rai no sasán banku ameasa atu foti tanba negosiante sira labele hetan rendimentu hodi selu.
“Dalan hotu taka hosi Estadu Emerjénsia agora serka sanitária tan, baibain produtu lokál sira komunidade lori ba fa’an iha Railaco, Gleno, Liquiça no Dili, maibé dalan taka pasiénsia sira labele lori ba fan. Agora iha ne’e tempu kafé no maek komunidade sira labele lori ba fa’an no halo sira moris difisil tebe-tebes,” Sandra de Araújo tenik.
Iha sorin seluk negosiante Leorema ne’ebé fan sasán iha merkadu Liquiça, Maria Lourdes hateten, sente triste tanba maioria produtu ema la sosa.
“Ami agora kréditu tan iha banku sira Moris Rasik, Tuba Rai, ema sisi ami kada semana ami osan la to’o atu selu, tusan sa’e maka’as rendimentu laiha,” Maria Lourdes hateten.
Jornalista : Hortencio Sanchez
Editór : Francisco Simões
