DILI, 10 maiu 2021 (TATOLI)—Bankada Kmanek Haburas Unidade Nasionál Timor Oan (KHUNTO) propoin atu reprezentante povu sira halo fiskalizasaun medida Governu nian kona-ba aplikasaun serka sanitária no konfinamentu domisiliária iha territóriu nasionál, maibé bankada Frente Revolusionária Timor-Leste Independente (FRETILIN) no Partidu Libertasaun Populár (PLP) la konkorda.
Vise-Prezidente Bankada KHUNTO, Deputadu António Verdiál de Sousa, husu atu deputadu sira halo fiskalizasaun ba asaun Governu nian kona-ba medida serka sanitaria no konfinamentu domisiliária iha ámbitu deklarasaun estadu emerjénsia ba dala-13.
“Ita-nia servisu ida fiskalizasaun ne’e previstu iha Rejimentu Parlamentu Nasionál, agora se ita hein, no hein ba hein. Ha’u-nia pergunta, COVID-19 ne’e to’o bainhira mak ita distinge nune’e ita bele hala’o kna’ar nu’udar deputadu ne’e. Tanba ne’e mak ha’u hatete fiskalizasaun ne’e la’o nafatin, importante mak ita nafatin mantein kumpre regra ne’ebé hatuur hosi Organizasaun Saúde Mundiál,” Deputadu António Verdiál de Sousa, levanta liuhosi plenária, segunda ne’e.
Nia esplika, deslokasaun ne’e la’ós la dala-ida hosi komisaun hotu-hotu maibé pelu menus karik komisaun hola inisiativa, ema na’in-rua bele haruka ba Liquiçá, ema na’in-rua haruka ba Covalima no ema na”inrua haruka ba Viqueque.
“Ha’u hanoin la sala ida karik, ida-ne’e mak ha’u-nia hakarak ho intensaun, atu komisaun nafatin marka prezensa hodi hala’o kna’ar hanesan deputadu,” nia dehan.
Entertantu Deputadu Bankada FRETILIN, Antoninho Bianco, subliña nia parte tuir ona teste swab no tún hodi halo observasaun iha terrenu ne’e tanba ne’e mak ita atu ba fiskaliza ne’e atu hasoru sé.
“Ita-nia (deputadu sira) prezensa mós ema ta’uk tanba ema hosi Dili keta lori moras karik, ne’e ha’u hetan hosi terrenu mak ne’e, ita mak tama dalaruma família rasik mós ta’uk. Tanba ne’e mak ita atu ba fiskaliza ne’e atu hasoru sé,” Deputadu Bankada FRETILIN ne’e hateten.
Nia propoin atu parlamentu halo rezolusaun ida nune’e deputadu hotu-hotu vasina, deputadu sira vasiona dala-rua ona bele la’o ona tanba deputadu sira iha imunidade forte.
Entretantu Vise-Xefe Bankada PLP, Deputadu Francisco de Vasconcelos, konsidera deklarasaun Verdiál nian hamosu konfuzaun.
“Ha’u rasik telefone ba maluk sira iha munisípiu, sira dehan ema hosi Dili ami la simu. Ne’e tanba iha deklarasaun estadu emerjénsia ita labele halibur ema to’o na’in-10. Fiskalizasaun ne’e ita lori ezemplu saida ba ita-nia sidadaun sira, ita husu ema tuur hakmatek iha uma depois ita ba fiskaliza saida,” Vise-Xefe Bankada PLP ne’e akresenta.
Jornalista: Evaristo Soares Martins
Editór: Cancio Ximenes
