DILI, 13 maiu 2021 (TATOLI)- Xefe Suku Bairru-Pité, Postu Administrativu Don Aleixo, Munisípiu Dili, João Baptista da Costa Belo, informa reklamante na’in 2.000-resin iha Suku Bairru-Pité mak seidauk simu Cesta Bázika.
Notísia Relevante : Teste swab obrigatóriu, abitante Bairru-Pité na’in-lima pozitivu
“Suku Bairru-Pité rasik iha Aldeia hamutuk 26, no família uma-kain hamutuk 5.000-resin ne’ebé simu hotu ona Cesta Bázika iha abríl, foin lalais ne’e, maibé momentu komunidade ba simu Cesta Bázika ne’e, família balun naran la sai no halo ona reklamasaun hamutuk ema na’in-2.000-resin,” Xefe Suku João Baptista da Costa Belo, informa ba Agência Tatoli iha Sede Suku Bairru-Pité, kinta ne’e.
Nia hateten, reklamante-sira ne’ebé seidauk simu Cesta Bázika naran hato’o ona ba Ministériu Administrasaun Estatál (MAE) no MAE rasik sei haree naran sira-ne’e loos ona koordena fali ho Ministériu Turizmu Komérsiu no Indústria (MTCI-sigla portugés) mak atu bele responde reklamante sira-nia preokupasaun.
Produtu ne’ebé kompañia distribui ba benefisiáriu-sira iha Suku Bairru-Pité, hanesan, na’an-karau, foos, mina, susu-been, no seluk tan, tanba ne’e ko’alia kona-ba produtu, Xefe Suku fó sasin katak produtu ne’ebé distribui ba abitante-sira ne’e mesak di’ak, tanba benefisiáriu sira nain rasik mak hili tuir sira-nia hakarak.
Jornalista : Arminda Fonseca
Editór : Francisco Simões
