DILI, 26 maiu 2021 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Longinhos Armando Leite, informa funsionáriu públiku balun hanesan ema na’in-haat-lima (4-5) mós rejistu ba programa “apoiu ba empregu” iha Institutu Nasionál Seguransa Sosiál (INSS).
Notísia Relevante: Simu xamada hosi SIJK, INSS halo mudansa rejistu ba empregadór-traballador
“Ha’u hakarak hateten katak ita-nia funsionáriu públiku balun maizumenus na’in haat ka lima mós mai rejistu, maibé dala ida tan subsídiu ne’e ba ita-nia empreza no traballadór inklui ho negosiante sira la’ós ba setór públiku no setór privadu sira,” Longinhos Armando Leite hatete ba jornalista sira, iha nia knaar fatin Caicoli, Dili, kuarta ne’e.
Kona-ba funsionáriu ne’ebé rejistu, Prezidente INSS hateten, nia informa ona ba ninia ezekutivu atu halo karta ba ministériu atu buka mekanizmu hodi identifika funsionáriu refere.
Notísia Relevante: COVID-19, Governu kria medida neen fó apoiu ba empregu sira
“Bainhira ami identifika ona funsionáriu ne’e hosi ministériu ida-ne’ebé, entaun ami sei haruka karta ba ministériu ne’ebé funsionáriu ne’e servisu haknaar-aan bá. Kona-ba sansaun ne’e, ministériu mak fó ona,” nia dehan.
Iha ne’e, nia dehan, sei haree mós razaun balun tanba keta karik mak nia funsionáriu públiku maibé dala ruma mós sai patraun ba taksi ka mikrolete ruma, hodi rejistu hanesan patraun ida.
“Maibé identifika ona katak nia ne’e funsionáriu. Karik nia taksi-na’in ka mikrolete-na’in mak ita sei haree took depois ita mós sei haree ba lei, bele ka lae funsionáriu ne’e atu rejistu ba apoiu empregu tanba nia hanesan patraun, tanba, iha pandemia COVID-19 mós iha impaktu ba nia rendimentu. Maibé, hirak ne’e presiza jurídiku haree lai,” nia informa.
Prezidente INSS hateten, ekipa INSS deteta kedas funsionáriu refere iha loron dahuluk bainhira hahú halo rejistu ba empregadór, traballadór no negosiante sira atu hetan subsídiu ne’e.
Notísia Relevante: INSS rejista ona entidade empregadór no traballadór hamutuk 1.715
Jornalista: Osória Marques
Editór: Cancio Ximenes
