DILI, 11 juñu 2021 (TATOLI)— Governu liu hosi Ministériu Saúde (MS) simu ona doasaun vasina COVID-19 ho tipu AstraZeneca hosi COVAX Facility, Governu Austrália no Governu Xina, hamutuk doze 294.800.
Hosi númeru ne’e, COVAX Facility oferese doze 124.800, Governu Austrália doze 70.000 no hosi Xina doze 100.000.
Notísia relevante:AstraZeneca doze daruak 100.800 to’o ona TL
“Númeru vasina ida-ne’e mak ita simu ona iha ita-nia rain,” Portavóz Komisaun Interministeriál ba vasinasaun kontra COVID-19, Daninha Coelho, hateten ba jornalista-sira iha salaun MSSI, sesta ne’e.
Númeru ne’ebé Governu atinji ona iha Dili, komesa hosi 07 abríl to’o oras-ne’e konsege oferese ona vasina AstraZeneca ba sidadaun hamutuk 83.771, ne’ebé korresponde ba 39% populasaun iha kapitál nasaun, hosi totál ema hamutuk 213.800 ho idade liu 18 ne’ebé presiza simu vasina.
Alende ne’e, hosi Timor laran tomak, iha ema ne’ebé idade 18 ba leten hamutuk 754.864 mak presiza atu simu vasina.
Iha okaziaun ne’e Daninha Coelho mós agardese ba nasaun-sira ne’ebé fó apoiu vasina hanesan Austrália, Xina no nasaun seluk ne’ebé mak hola parte iha COVAX Facility hodi tau orsamentu atu fornese vasina ne’e mai Timor-Leste mak hanesan Bhutan, Canada, Colombia, Repúblika Koreia Súl, Kuwait, Monaco, Nova Zelándia, Quatar, Saúde Arabia, Singapura, Ekipa Europeia, Reinu Unidu no Estadu Unidu Amérika.
Tuir dadus Governu nian katak, vasina doze dahuluk ne’ebé hahú iha 07 abríl mai to’o agora la’o normál, la rejista efeitu adversu ne’ebé todan liu.
Kompleta doze daruak, sirkula livremente
Iha sorin seluk, Koordenadór Forsa-Tarrefa ba Prevensaun no Mitigasaun, Rui Maria de Araújo, informa ema ne’ebé simu ona vasina doze daru’ak bele sirkula livremente tama ka sai serka sanitária, no la presiza hetan autorizasaun esepsionál hosi diretór Sentru Integradu Jestaun Krize.
”Informa ba populasaun tomak katak, ema ne’ebé simu ona vasina doze daru’ak hasoru virus SARS-CoV-2–naran vasina ida hosi hirak ne’ebé rekoñesidu Organizasaun Mundiál Saúde, bele ona sirkula livremente, la presiza hetan autorizasaun esepsionál,” Rui Maria de Araújo, informa liuhosi komunikadu.
Ohin, SIJK rejista kazu pozitivu 31, rekoperadu 164 no kazu ativu 1.616. Hosi kazu foun ohin, Dili iha 22 no munisípiu-sira iha na’in-sia.
Jornalista: Felicidade Ximenes
Editór: Cipriano Colo
