VIQUEQUE, 16 juñu 2021 (TATOLI)- Profesór na’in-900 iha Munisípiu Viqueque prontu ona atu simu vasina AstraZeneca doze dahuluk, kinta-sesta (17-18/06).
Notísia Relevante : Ekipa liña frente Viqueque hahú simu vasina doze daruak
“Ami-nia profesór-sira ne’ebé tuir planu simu vasina doze dahuluk ne’e durante loron rua; kinta-sesta (17-18/06),” diretór Edukasaun Munisípiu Viqueque, Emidio Amaral, informa ba Agência Tatoli iha Viqueque, kuarta ne’e.
Emilio hatutan, profesór ne’ebé isin di’ak mak simu vasina, enkuantu profesór-sira balun iha moras komplikadu tenke hatudu atestadu médiku atu sira labele tuir. Maibé sira ne’ebé saúde normál hotu tenke tuir vasina nune’e eskola loke fali sira bele hamriik iha estudante sira-nia sorin.
Nia informa, vasina ne’e sei hahú iha eskola sentrál no sekundáriu jerál sira ne’ebé iha Postu Administrativu Ossu, Lacluta, Viqueque Vila, Uatulari ho Postu Administrativu Uatucarbau. Tanba ne’e, profesór-sira bele hakbesik-an ba simu vasina.
Munisípiu Viqueque iha pre-eskolár hamutuk 36, Ensinu Báziku Sentrál (EBC) 21, Ensinu Sekundáriu Jerál (ESJ) ida (1) no Ensinu Tékniku Vokasionál (ETV) ida (1).
Jornalista : Vitorino Lopes da Costa
Editór : Francisco Simões
