PPN deside funsionáriu PN vasina obrigatóriu
DILI, 18 juñu 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, deside funsionáriu parlamentu nasionál obrigatóriu tenke simu vasina.
Notísia Relevante: PPN husu deputadu hotu simu vasina AstraZeneca
“Ohin, Parlamentu Nasionál nível meza prezidénsia tuir ona vasina doze daruak nian no funsionáriu sira. Ba deputadu sira tuir idak-idak nia konsiénsia. Maibé funsionáriu Parlamentu Nasionál, ha’u deside tenke obrigatóriu simu vasina. Kuandu la vasiona labele tama iha resintu Parlamentu Nasionál nian,” Prezidente Parlamentu Nasionál ne’e informa ba jornalista sira, iha uma fukun, sesta ne’e.
Funsionáriu sira tenke simu vasina, nune’e aumenta imunidade hodi halo prevensaun ba propagasaun surtu COVID-19.
Bainhira simu ona vasina daruak bele halo sirkulasaun livre maibé tenke kumprimenta nafatin protokolu COVID-19 nian hanesan uza maskára, distansiamentu sosiál no fase-liman beibeik ho sabaun.
Prezidente Parlamentu Nasionál aprova ona kritéria atu deputadu sira bele halo fiskalizasaun, maibé deputadu sira-ne’ebé la simu vasina labele tuir fiskalizasaun.
“Se lae, bele lori fali virus ba munisípiu, liu-liu hasoru populasaun sira. Kuandu nia ida tuir atividade partidu nian, entaun responsabilidade sira-nian. Kuandu ba hanesan deputadu tenke kumpre rekizitu vasina ne’e,” nia dehan.
Tanba ne’e, Prezidente Parlamentu Nasionál enkoraja Timor-oan hotu atu hakbesik ba sentru saúde ne’ebé besik hodi simu vasina, tanba saúde públika ne’e importante ba moris.
Jornalista: Evaristo Soares Martins
Editór: Cancio Ximenes
