DILI, 23 juñu 2021 (TATOLI)—Liuhosi reuniaun Konsellu Ministru (KM), Governu deside mantein impozisaun Serka Sanitária iha munisípiu Baucau no Dili ba loron hitu tan no hakotu iha Bobonaro no Covalima.
Desizaun ne’e Governu foti hafoin halo análiza ba aprezentasaun pontu situasaun epidemiolójika nasionál, hosi Sala Situasaun, Sentru Integradu Jestaun Krize (CIGC, sigla portugés), hafoin Governu aprova liuhosi Projetu Rezolusaun Governu.
“Bandu nafatin sirkulasaun ema sira-nia entre munisípiu Baucau no Dili no sirkunskrisaun administrativa sira seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.
Notísia relevante: Governu kontinua renova Serka Sanitária iha Baucau no hakotu Viqueque
CIGC rejista kazu foun, iha kuarta (23/06) ne’e, hamutuk 62, ne’ebé hosi Dili 37 no munisípiu seluk hamutuk 28, nune’e kazu ativu 986, hosi totál rejistadu gosi marsu 2020 to’o agora hamutuk 986.
Hosi totál kazu ativu ne’e, munisípiu Dili hamutuk 579 no iha Baucau 179, ne’ebé sei a’as kompara hosi munisípiu seluk.
Jornalista : Antónia Gusmão
Editora : Julia Chatarina
