DILI, 21 jullu 2021 (TATOLI)-Negosiante-sira ne’ebé fa’an produtu lokál iha merkadu tradisionál Lecidere, Dili, triste tanba produtu lokál ne’ebé sira fa’an ladún folin.
Negosiante Sonia Cardoso hateten, durante Governu aplika Estadu Emerjénsia, serka sanitária no konfinamentu obrigatóriu to’o agora produtu ne’ebé sira fa’an ladún folin tanba iha merkadu refere fa’an depende liu ba ema estranjeiru.
“Durante ne’e ema estranjeiru barak maka sosa produtu lokál sira-ne’e, maibé COVID-19 mosu ema estranjeiru sira fila-fali ba sira-nia rai, nune’e ema ladún mai sosa ona,” Sonia Cardoso, hateten ba Agência Tatoli iha Merkadu Tradisionál Lecidere, Dili, kuarta ne’e.
Nia hatutan, produtu lokál ne’ebé nia fa’an hanesan, jambua, ai-dila, tomate, lakeru, fehuk midar, talas no seluk tan.
“Kompara antes COVID-19 no agora, uluk loron ida ami bele hetan rendimentu sa’e liu $50, tun liu $40, maibé agora, loron ida ami bele hetan $ 10 no dala-ruma la to’o,” nia hateten.
Iha fatin hanesan, negosiante Alda Maria Gusmão hateten, maske agora Dili livre ona hosi konfinamentu obrigatóriu maibé produtu kontinua la folin tanba ema la hola.
“Situasaun agora rendimentu loron ida tama hetan sa’e liu $20 tun liu $10, maske ema la sosa maibé ami kontinua fa’an hodi sustenta moris,” nia hateten.
Jornalista : Arminda Fonseca
Editór : Francisco Simões
