DILI, 11 agostu 2021 (TATOLI)—Diretór Serbisu Saúde munisípiu Ermera, António de Deus Fátima, hateten númeru variante delta aumenta iha munisípiu ne’e tanba komunidade tama-sai fronteira terrestre ilegalmente.
“Variante delta sa’e maka’as iha munisípiu Ermera tanba komunidade tama-sai fronteira ilegalmente. Hosi movimentu ne’e mak lori moras ne’e mai. Maioria joven hosi Ermera mak deskonfia nu’udár membru grupu arte marsiál ne’ebé ba tuir ezame iha Indonézia iha fulan jullu,” António de Deus Fátima hateten ba jornalista Agência Tatoli via telefónika, kuarta ne’e.
Notísia relevante:COVID-19: Óbitu ida, rejista variante Delta na’in-12 iha Ermera
Diretór ne’e esplika, pesoál saúde-sira observa hela katak, pasiente hirak-ne’ebé sofre variante delta COVID-19, maioria hatudu síntoma moderadu, nune’e tenke halo lalais atuasaun atu prevene labele tama ba situasaun grave.
“Sira ne’ebé infetadu variante delta ami tau fatin ketak, nune’e labele da’et ba ema seluk,” nia hatutan.
Parte serbisu saúde Ermera mós foti ona amostra ba família pasiente infetadu delta, no hein hela rezultadu, bainhira iha balun pozitivu ekipa sei evakua kedan ba izolamentu iha estádiu kafé Ermera no sei la autoriza atu halo auto-izolamentu iha uma.
Antes ne’e, Diretora Jerál Prestasaun Serbisu Saúde, Odete da Silva Viegas, hateten pasiente variante delta iha munisípiu Ermera detetadu tanba antes ne’e parte saúde haruka sampel amostra hosi ema na’in 20 ba Austrália hodi halo teste laboratóriu no rezultadu detekta ema na’in 12 mak infetadu, sei hein tan rezultadu amostra hosi ema na’in-ualu.
Jornalista: Felicidade Ximenes
Editór: Cipriano Colo
