DILI, 12 agostu 2021 (TATOLI) – Konsultór Relasaun Públika JICA iha Timor-Leste, Emilio dos Santos, informa JICA iha kompromisu aapoiu setór saúde iha Timor-Leste liu-liu kombate peste letál Covid-19.
JICA hahú apoiu servisu saúde iha Timor-Leste iha 2017 iha SAMES hodi destaka voluntáriu JICA iha area farmásia hodi apoiu servisu medikamentu SAMES nian. Nune’e iha pandemia Covid-19 ne’e mós JICA fó apoiu oinsá atu halo prevensaun.
Emilio dos Santos ba Agência Tatoli iha edifísiu JICA Dili, kinta ne’e, konfirma JICA mós estabelese kooperasaun sira seluk ho SAMES iha parte rekursu umanu no kooperasaun tékniku hodi apoiu ekipamentu atu mellora sistema kadeia fornesimentu korrente malirin /Cold Chain Supply System iha SAMES no JICA sei mantein ninia apoiu ba SAMES liu-liu iha pandemia Covid-19 ne’ebé TL enfrenta.
JICA apoiu ona karreta Cold Box ida no Cold Box movel 15 hodi apoiu SAMES atu transporta vasina iha territóriu TL.
JICA mós komprometidu ona hodi apoiu tan karreta mini truck ualu, truck tolu, karreta cold box ida no forklift haat ba SAMES ne’ebé sei to’o iha Timor – Leste iha tempu badak nia laran.
Fó treinamentu ba funsionáriu SAMES
JICA mós durante ne’e hala’o treinamentu durante loron ida iha SAMES oinsá bele pratika utiliza cold box ne’ebé tau ai-moruk no seluk tan.
Apoiu sira hosi JICA a ne’e hanesan realizasaun hosi JICA nia kompromisu hodi apoiu Governu Timor-Leste responde ba pandemia Covid-19, liu-liu atu apoiu sistema Cold Supply Chain iha SAMES.
Jornalista : Hortencio Sanchez
Editór : Francisco Simões
