DILI, 18 agostu 2021 (TATOLI) – Mezmu iha disaun Estadu nian bele hala’o eleisaun iha diaspora, hanesan iha Korea du Sul, Austrália, Portugal no Reinu Uninu, maibé Estadu seidauk permite atu hala’o iha Indonézia.
Notísia Relevante : MNEK-STAE koordena malu prepara eleisaun iha diaspora
“Indonézia, ita sei la hala’o eleisaun iha ne’ebá tanba desizaun polítika,” Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten hodi responde Agência Tatoli iha Palásiu Governu, Dili, kuarta ne’e.
Timor-Leste iha esperiénsia rasik hala’o eleisaun iha 2017 no 2018 iha diaspora, maibé la inklui Indonézia, maski Timoroan barak mak hela iha ne’ebá liu-liu estudante sira.
Ba nasaun sira ne’ebé Estadu autoriza hala’o eleisaun prezidensiál ho eleisaun jerál, maka daudaun ne’e MNEK koopera ona ho Sekretariadu Téknika Administrasaun Eleitorál (STAE) atu halo preparasaun téknika atu bele dezloka ba nasaun sira refere hodi halo preparasaun.
Jornalista : Hortencio Sanchez
Editór : Francisco Simões
