DILI, 18 agostu 2021 (TATOLI)—Polísia Nasionál Timor-Leste (PNTL), munisípiu Dili, liuhosi Unidade Seksaun Tránzitu, sei regula sirkulasaun motorizada tula labarik ne’ebé seida’uk halo tinan hitu.
Regularizasaun ne’e ho baze dekretu lei númeru 6/2003, loron 03 abríl, kodígu estrada ne’ebé previstu iha seksaun II transporte ba pasajeiru no náha, iha mós artigu 85 ko’alia kona-bá tula pasajeiru.
Notísia relevante:Polísia Tránzitu halo apreensaun ba motór 66
Hosi artigu ne’e, iha alinea 1 hateten labele tula pasajeiru ne’ebé seida’uk halo tinan hitu (7) iha motór siklu no siklu motór, maibé bele tula bainhira iha tuur-fatin ne’ebé la’ós atu tau de’it náha, maibé bele sai mós hanesan ema nia tuur-fatin.
Nune’e mós iha alinea 2, labele tula ema iha velosiple no iha alinea 3 hateten ema ne’ebé la halo-tuir regra nu’udár hakerek iha númeru hirak uluk, sei sei multa $6 to’o $12.
“Hanesan apelu ida no sei halo divulgasaun ba públiku kona-bá atu implementa artigu ne’e, hodi regula sirkulasaun motorizada tula labarik ne’ebé seida’uk halo tinan hitu, hodi asegura prevensaun ba dezastre,” Komandante Tránzitu munisípiu Dili, Inspetór, Domingos Sarmento Gama, hateten ba jornalista-sira iha Caicoli, kuarta ne’e.
Nia esplika, lei ne’e autoriza bele tula labarik ne’ebé seida’uk halo tinan hitu, maibé tenke ho kondisaun katak, bainhira tula labele tuur iha fatin naha nian.
Ezemplu, hanesan ba motór boot labele tuur iha tanke-matan enxe mina nian no motór kiik labele hamriik ka tuur iha parte oin.
Lei ne’e vigór durante tinan 18 ona , maibé seida’uk implementa to’o agora tanba kondisaun sosiál-sira maibé agora hanoin ona sei implementa iha tempu besik.
Jornalista: Nelson de Sousa
Editór: Cipriano Colo
