OÉ-CUSSE, 01 setembru 2021 (TATOLI)–Sentru Informasaun COVID-19, Rejiaun Administrativa Espesiál Oé-Cusse Ambeno (RAEOA), kuarta ne’e rejista kazu pozitivu foun hamutuk hitu (7), kazu ativu baixa iha izolamentu hamutuk 49 no rekoperadu 160.
Notísia Relevante: COVID-19: pesoál saúde RAEOA na’in-12 pozitivu no ativu 73
“Ita-nia númeru pozitivu COVID-19 kada loron tun. Ohin, ita rejista pozitivu na’in-7, kumpre hela iha izolamentu 49, rekoperadu 160, komulativu kazu konfirmadu 209 no kumpre hela kuarentena obrigatóriu 91,” Sekretáriu Rejionál Asuntu Saúde, Manuel da Costa, hateten ba Agência Tatoli iha Sikluli, Oé-Cusse, kuarta ne’e
Dirijente saúde ne’e fundamenta, RAEOA sei kontinua alerta pontu hitu ne’ebé aprova hosi Prezidente Autoridade, nune’e bele kontrola no prevene moras COVID-19 iha Oé-Cusse. Pontu hitu ne’e mak:
1.) Husu ba populasaun Oé-Cusse mantein distánsia, uza máskara taka inus no ibun bainhira sai ba fatin públiku ka privadu ne’ebé ema barak uza, fase liman bainhira atu tama ba estabelesimentu komersiál, industriál ka prestasaun serbisu nian ka iha edifísiu sira, iha ne’ebé serbisu administrasaun públika funsiona.
2.) Ema hotu-hotu ne’ebé hakarak tama ka sai hosi territóriu nasionál iha obrigasaun atu kumpre kontrolu sanitáriu, bazea ba regulamentu sanitáriu internasionál.
3.) Bandu hakat liu rai ketan atu halo atividade tradisionál ka kostumeira sira no atu asesu ba merkadu sira-ne’ebé mak regula tiha ona.
4.) Ema sira-ne’ebé tama iha territóriu nasionál maibé la respeita regra sira-ne’ebé hatuur ona iha númeru (2) no (3), sei hetan koima ho valór hosi $30 to’o $250, no sei selu rasik ninia despeza sira ba Izolamentu profilátiku ne’e no aplikasaun no kobransa hosi koima ne’ebé mak prevee iha númeru anteriór, kumpre regra sira-ne’ebé hatuur ona iha artigu 149-154, hosi Lei 11/2017, loron 24 fulan-maiu.
5.) Ema sira-ne’ebé hatudu sintomatolojía ba moras COVID-19 ka hetan infesaun hosi SARS-CoV-2 labele tama iha autokaru ka embarka ka sa’e ba Ró ka Aviaun sira no temperatura isin-lolon nian ka isin manas ho grau 37.5.C ka aas liu 37.5.C (grau sentígradu tolu nulu-resin-hitu ho balun) me’ar; kakorok moras, inus-metin no fani; dada iis susar ka sente iis atu kotu.
6.) Pesoál misaun diplomátika nian hirak ne’ebé hetan ona akreditasaun iha Dili bele kumpre períodu izolamentu profilátiku iha fatin ne’ebé Ministériu Saúde (MS) indika ona ka iha sira-nia hela fatin rasik.
7.) Despeza sira kona-ba izolamentu profilátiku sei selu hosi ema ida-idak bainhira izolamentu ne’e kumpre iha estabelesimentu saúde privadu ka iha sentru izolamentu privadu sira.
Jornalista : Abílio Elo Nini
Editór : Cancio Ximenes
