DILI, 07 setembru 2021 (TATOLI)—Polísia Nasionál Timor-Leste (PNTL), konklui ona identifikasaun ba Timoroan na’in 250 ne’ebé antes ne’e hetan deportasaun hosi autoridade Indonézia tanba hakat ilegál ba Atambua, nune’e faze tuir mai sei submete ba Ministériu Públiku (MP).
“Sidadaun na’in 250 sei enkamiña ba MP, hodi loke prosesu kriminál tuir-mai,” Portavóz, Komandu Jerál PNTL, Superitendente Xefe, Arnaldo Araújo, hateten ba jornalista-sira liuhosi konferénsia impresa, iha edifísiu Komandu Jerál, Caicoli, tersa ne’e.
Notísia relevante:Autoridade seguransa Indonézia deporta timoroan 352 mai TL
Serbisu Investigasaun Kriminál Nasionál (SIKN) mós kontinua halo tan identifikasaun ba Timoroan na’in 50, tanba kompleta ona kuarantena, iha tersa ne’e.
Antes ne’e, Autoridade Indonézia deporta Timoroan hamutuk na’in 719, kompostu hosi mane 689 no feto 39, ne’ebé hakat ilegál fronteira ba Atambua, hodi tuir ezame arte marsiál no agora sidadaun balun kontinua kumpre kuarantena, hein prosesu idendifikasaun tuir-mai.
Bazeia ba lei Imigrasaun no tuir dekretu Governu númeru 19/2021, 1 jullu kona-bá medida ezekusaun deklarasaun Estadu Emerjénsia, efetua hodi dekretu Prezidente Repúblika númeru 39/2021, juñu ne’e iha artigu 7, obrigatóriu kontrola sanitária, iha alinea 4 hateten indivídu ne’ebé tama-sai territóriu nasionál ho dalan ilegál, sei hetan koima ho valór mínimu $30 no másimu $250, maibé tenke kumpre uluk kuarentena durante loron 14, hafoin investiga no aplika multa.
Alende ne’e, kualkér sidadaun ne’ebé dezobediénsia ba regra, autoridade bele loke prosesu kriminál.
Jornalista: Nelson de Sousa
Editór: Cipriano Colo
