DILI, 09 setembru 2021 (TATOLI)-Diretór Verifikasaun no Lisensa Liga Futeból Timor-Leste (LFTL), José Carvalho, hateten, LFTL simu ona karta formal hosi klube Primeira Divizaun Boavista FC Timor, kona-ba atu la partisipa tan ona iha jogu ne’ebé organiza hosi LFTL no taka ona klube totalmente.
“Loron hirak liubá, Boavista FC Timor fó sai ona iha sira-nia mídia katak taka ona klube ne’e, ohin iha tuku 09:00 dadeer sira mai ona lori ho karta hatama ba ami katak sira sei taka ona klube ne’e,” José Carvalho ba Agência Tatoli iha edifísiu LFTL Dili, kinta ne’e.
Nia dehan, kona-ba asuntu ne’e ezekutivu LFTL no estrutura hotu sei tur hamutuk hodi ko’alia kona-ba asuntu ne’e. Razaun Boavista taka ona klube ne’e tanba problema finanseiru.
Klube jigante kapitál Dili ne’e hahú iha Liga Futeból Amadora (LFA) iha 2015, iha ne’ebé ho naran Carsae FC no mai iha 2017 klube deside troka naran ba Boavista FC no kampeaun kedan ba LFA iha 2017. Maibé, ohin loron, tanba pandemia COVID-19 halo ekonomia rai laran monu liga mós paradu kuaze tinan-rua ona halo finansiamentu klube monu no Boavista rasik deside taka ona klube.
Jornalista : Hotencio Sanchez
Editór : Francisco Simões
