DILI, 20 setembru 2021 (TATOLI)—Primeiru-Ministru (PM), Taur Matan Ruak, aprezenta Projetu Dekretu-Lei iha reuniaun Konsellu Ministru extraordinária, atu kria servisu apoiu ba sosiedade sivil no auditoria sosiál.
“Ho aprovasaun ne’e, Gabinete Apoiu ba Sosiedade Sivil no Unidade Auditoria Sosiál, hosi Gabinete Primeiru-Ministru, sei transforma ba Servisu Apoiu ba Sosiedade Sivil no Auditoria Sosiál, ho atribuisaun autonomia administrativa no finanseira,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu, segunda ne’e.
Tuir Portavóz Governu, transformasaun ne’e hodi garante kapasidade resposta ho lalais ba servisu Administrasaun Públika, ne’ebé responsável atu hatán ba solisitasaun sira ne’ebé mai hosi organizasaun sosiedade sivil.
Servisu apoiu ne’e sei dirije hosi Diretór Ezekutivu ida, ierarkiamente subordina ba Primeiru-Ministru no koadjuva hosi Diretór Adjuntu ida ba subvensaun públika no Diretór Adjuntu ba Administrasaun no Finansa.
Jornalista : Antónia Gusmão
Editora : Julia Chatarina
