BOBONARO, 20 setembru 2021 (TATOLI)—Serbisu Edukasaun Munisípiu Bobonaro, hamutuk ho komunidade iha suku Holsa, postu administrativu Maliana, hala’o enkontru preparasaun atu hili no forma estrutura, ne’ebe sei halo jestaun ba orsamentu konstrusaun edifísiu eskola Ensinu Báziku Filiál (EBF) Oplegul.
Diretór Serbisu Edukasaun Munisípiu Bobonaro, Crispin Moniz, hateten tinan ne’e munisípiu Bobonaro hetan pojetu komunitária 21 hosi Ministériu Edukasaun Joventude no Desportu (MEJD) atu konstrui infraestrutura edukasaun ne’ebé kondisaun aat durante tinan barak.
Notísia relevante:Serbisu Edukasaun Bobonaro iha programa solidariedade
“Ita bele forma grupu atu bele asegura andamentu projetu, tuir matadalan ne’ebé iha, tanba osan ne’e suku mak halo jestaun,” Crispin Moniz, hateten iha Oplegul, segunda ne’e.
Matadalan MEJD hateten katak, grupu ne’ebé atu halo jestaun ba orsamentu ne’e kompostu hosi Xefe grupu ho vise ida, tezoreiru rua, sekretáriu rua ho membru na’in-lima.
Bainhira komunidade forma ona grupu ne’ebe atu halo jestaun ba orsamentu, parte Edukasaun munisipál sei aprezenta relatóriu ba MEJD, mak foin halo tranferénsia orsamentu ba konta bankária grupu.
Atu asegura kualidade obra MEJD mós sei rekruta enjiñeiru lokál na’in 21 no sei akompaña hosi enjiñeiru nasionál ida, atu responsabiliza no halo kontrolu ba projetu ne’e to’o finaliza.
Iha fatin hanesan, Xefe Suku Holsa, António Santa Cruz konsidera projetu ne’e sei benefisia direta komunidade, hodi sustenta nesesidade uma-laran no ba oan sira-nia eskola.
Autoridade lokál ne’e promete sei responsabiliza no halo supervizaun ba obra ne’ebé sei realiza, nune’e bele motiva traballadór-sira, hatudu serbisu ho di’ak hodi garante kualidade.
Edifísiu eskola atuál konstrui iha 2009 ho pakote referendu ho tipu uma semi permanente, kompleta ho sala-de-aula tolu inklui sala profesór ne’ebé didin de’it ho piku.
Totál estudante hosi primeiru to’o sestu anu hamutuk na’in 150 ho profesór permanente na’in-ida no kontratadu na’in-lima.
Jornalista: Sérgio da Cruz
Editór: Cipriano Colo
