DILI, 29 setembru 2021 (TATOLI)—Kablaki FC obrigadu tenke derrota kontra São Francisco Xavier FC ho rezultadu 1-2.
Derrota ne’e akontese iha jogu jornada 12 Prá Liga Timor–Leste, ne’ebé realiza iha kuarta, iha kampu futsál FALINTIL-Forsa Defeza Timor–Leste (F-FDTL), Fatuhada Dili.
Notísia relevante:Pra Liga Futsal, Santa Cruz ‘liki’ Kuda Ulun 6-1
Ekipa São Francisco hatudu jogu bonito, maibé forsa hosi ekipa rua ne’e laiha diferente, tanba kontra ho atake ba malu hanesan de’it.
Maioria jogu ekipa rua ne’e halo ho ofensivu hodi lansa bola dook, iha minutu primeiru, jogu loke kedan ho sutu barak hosi ekipa rua ne’e maski la kona iha alvu no barak maka guarda rede parte rua salva.
Kablaki la iha ambisaun no la ansi bainhira hetan oportunidade foin mak prodús golu, nune’e iha minutu ualu sorte monu duni ba jogadór Tomas de Araújo hodi prodús golu ida hodi muda rezultadu ba 1-0.
Jogu komesa manas liu tan, nune’e golu ne’e sunu los jogadór São Francisco nian no esforsu hirak-ne’e la hela de’it ho esforsu, tanba iha minutu 30, Gaudêncio Fernandes, responde kedan golu ida hodi muda rezultadu ba 1-1.
Nune’e hakat tan ba minutu 34, jogadór São Francisco, Agostinho Soares, prodús tan golu ida, hodi prega metin rezultadu vitória ba 2-1.
Too minutu ikus jogu termina, vitória hela ba São Francisco no Kablaki tenke lakon.
Jornalista: Hortencio Sanchez
Editór: Cipriano Colo
