DILI, 29 setembru 2021 (TATOLI)—Organizasaun ProEma realiza atividade han meudia hamutuk ho parte Kámara Komérsiu no Indústria Timor-Leste (CCI-TL, sigla portugés) no entidade relevante seluk, atu fortifika estabelesimentu banku ai-han hodi fó apoiu ba ema vulnerável ne’ebé presiza.
“Ami-nia esperansa, liuhosi almosu ida-ne’e bele konsensializa emprezáriu lokál sira atubele iha hanoin halo doasaun ba banku ida-ne’e, nune’e bele funsiona di’ak liu tan,” Diretora ProEma, Ana Paulina da Costa, hateten, iha Restaurante ProEma, Bidau Lecidere, kuarta ne’e.
Tuir Responsável programa ne’e, doasaun la signifika tenke fó osan, maibé karik sira ne’ebé iha supermerkadu, bele fó mós sasán.
“Ezemplu, hanesan lei hateten, sasan sira ne’ebé maka besik expira pelumenus fulan-neen, antes ne’e tenke hasai hosi supermerkadu, em vez de soe ba lixu, maibé molok expira, semana ida ka fulan-ida, bele halo doasaun ba proEma, atu nune’e ami bele aproveita fali ai-han ne’e, hodi kria filafali sai hahán ne’ebé maka di’ak atubele fornese ba komunidade sira ne’ebé maka presiza,” nia akresenta.
Atividade ne’e ba dahuluk iha Timor-Leste, tanba ne’e Responsável programa husu entidade hotu ne’ebé iha kbiit bele kontribui.
“ProEma iha inisiativa atu halo ida-ne’e, tanba ami haree kondisaun sosiedade hafoin inundasaun iha problema barak, tanba ne’e ami iha kuziña solidaridade, ne’ebé maka ami rasik iha ai-han no ekipa, ne’ebé semana ida dala ida fornese ai-han saudável ba alin kiik-oan sira no inan isin-rua sira,” nia hatutan.
Banku ai-han ne’e hetan ona apoiu hosi Nova Zelándia hodi haforsa kontinuasaun atividade.
Iha fatin hanesan, Diretór Ezekutivu CCI-TL, Rui Alexandrinho Paicheco, rekoñese, emprezáriu sira seidauk koñese kona-ba banku ai-han ho di’ak, tanba ne’e, liuhosi atividade ne’e, ProEma bele esklarese kona-ba inisiativa hodi emprezáriu sira bele apoiu atividade.
“Liuhosi atividade ne’e, ProEma no CCI-TL bele organiza no divulga informasaun ba ita-nia emprezáriu sira hotu, liu-liu sira ne’ebé maka liga ho sentru komersiál sira atubele haforsa nafatin estabelesimentu banku ai-han,” nia dehan.
ProEma hanesan organizasaun feto, ne’ebé iha servisu atu empodera no kapasita joven feto sira iha área oioin.
Iha tinan 2020, organizasaun ne’e hahú inisiativa envolve setór privadu hodi estabelese banku ai-han, ne’ebé halo ona lansamentu iha juñu tinan ne’e.
Jornalista : Natalino Costa
Editora : Julia Chatarina
