DILI, 29 setembru 2021 (TATOLI)–Sentru Estudu Kulturál no Arte hosi Universidade Nasionál Timor-Lorosa’e (SEKA-UNTL) realiza kolókiu durante loron-rua ho tema ‘Timor-Leste edukasaun, siénsia no kultura’, atu aborda área temátika hanesan lingua ensinu média no komunikasaun, inklui kultura linguístika kuríkulu no meiu ambiente.
Reitór UNTL, João Soares Martins, konsidera atividade ne’e importante tebes tanba bele explora kestaun ligadu ho siénsia, edukasaun no kultura.
“Kolókiu ne’e importante tebes. Ha’u agradese ba SEKA tanba bele hala’o ona atividade ne’e hodi explora liután kestaun ligasaun ho siénsia edukasaun inklui kultura atu ita bele halo estudu kle’an liu ba ita-nia kultura rasik,” Reitór João Soares hateten iha auditorium liceu, kuarta ne’e.
UNTL harii sentru kulturál ne’e atu hala’o estudu sientífiku hodi explora raís kultura iha nasaun ida, hodi bele ajuda jerasaun foun sira hatene liután rikeza iha nasaun ne’e.
“Ita-nia inan-aman sira hahú katuas ba daudaun, tanba ne’e, ita hanesan jerasaun foun sira mak tenki kontinua promove ita-nia kultura sira, atu kultura iha país ne’e labele lakon,” nia akresenta.
Iha biban hanesan, Diretór SEKA-UNTL, Paulino Vicente, hateten, Timor-Leste presiza promosaun eventu sientífiku sira atubele fahe informasaun kona-ba siénsia, kultura no edukasaun, tanba ne’e kolókiu ne’e rasik sei aborda área temátika.
Atividade ne’e foin realiza ba dahuluk ho intensaun atu promove traballu profesór no estudante sira, ne’ebé mak finaliza ona iha área temátika sira.
Jornalista : Tomé Amado
Editora : Julia Chatarina
