BAUCAU, 07 outubru 2021 (TATOLI)–Tribunál Distritál Baucau (TDB) hala’o julgamentu ba arguidu inisiál MFF ho kazu krime maus tratos konjuga no violénsia doméstika hasoru ninian fen inisiál CPP.
Kazu refere rejista NUC 01/32/20/BCB, akontese iha aldeia Osoneru, suku Buruma, postu administrativu Baucau-Villa iha fulan outubru no novembru 2020.
Defeza, José Maria Guterres, hateten kazu refere akontese tanba fen deskonfia arguidu iha relasaun domin ho feto seluk, nune’e arguidu nervozu hodi baku lezada.
“Motivu kazu ne’e tanba situasaun moris iha uma-laran, ferik oan mak deskonfia laen halo amante ho ema seluk,” José hateten iha TDB, Villa-nova, kinta ne’e.
Ministériu Públiku (MP) akuza arguidu ho artigu 154 hosi kódigu penál no lei violénsia doméstika artigu 35 númeru 7/2010, ne’ebé ameasa prizaun tinan 2 to’o tinan 6.
Durante julgamentu, MP ho defeza halo kedas alegasaun ba arguidu ho lezada, ne’ebé loron 21 outubru sei iha desizaun hosi Tribunál liuhosi leitura akordaun.
Prosesu julgamentu prezide hosi juís koletivu Sribuana da Costa, MP reprezenta hosi prokuradór, João Martins no arguidu hetan defeza hosi Defensor Públiku, José Maria Guterres.
Jornalista : Natalino Belo
Editora : Julia Chatarina
