BOBONARO,19 outubro 2021 (TATOLI)—Ensinu Báziku Sentrál (EBC, sigla portugés) Raifun, postu administrativu Maliana, munisípiu Bobonaro, presiza moru protesaun hodi asegura fasilidade mobiliáriu no ekipamemtu eskola sira seluk.
“Ami presiza moru protesaun tanba iha eskola ida-ne’e, komunidade sira uza motorizada ho karreta la’o ba-mai livre, animál mós livre, dalaruma ema laiha responsablidade balu tama-sai foti livru sira iha biblioteka lori lakon hotu,” Adjuntu Diretór EBC Raifun, Domingos Mendes, informa Agência TATOLI, iha nia kna’ar-fatin, segunda ne’e.
Nia esplika, iha 2017 parte eskola koopera ho inan-aman sira, kada fulan estudante ida kontribui sentavu $50 hodi konstrui moru kuaze metru 100 maibé obra hirak-ne’e la konsege finaliza tanba enfrenta kestaun limitasaun orsamentu.
Ho problema hirak-ne’e, dirijente eskola aprezenta beibeik proposta ba diresaun edukasaun munisípal Bobonaro, atu ekamiña ba nasionál, maibé proposta hirak-ne’e seidauk tau ba ajenda prioridade.
“To’o agora governu seidauk iha hanoin atu kontinua obra sira-ne’e, entaun eskola kontinua sofre iha buat ida, sirkulasaun livre ne’e dalaruma motorizada lian boot ida tama mai, labarik sira labele aprende ho di’ak, nune’e mós kuandu iha tempu udan, eskola ne’e tahu-dodok tanba karreta movimenta ba-mai,” nia haktuir.
“Meza sira ne’e ajuda hosi Eis Prezidente Repúblika Taur Maran Ruak, ne’e mak ami iha meza single ne’e por volta 200 no karteira ida ligadu ka gandengan ne’e mÓs 200, maibé tanba antigu liu ona, barak mak tohar no rahun, at ona ami hadi’a aat fali, ami hadi’a tán mós aat nafatin, falta de’it 150 de’it mak kondisaun sei di’ak,” nia informa.
Problema limitasaun fasilidade ne’e fó impaktu ba ensinu aprendizajen iha aula laran, tanba obrigatóriu sala ida bele akumula estudante besik 50 turma ida.
Totál sala aula iha EBC Raifun hmutuk 11, sala permanente neen (6) no sala semi-permantente haat (4), enkuantu totál estudante hosi primeiru-anu to’o terseiru-siklu hamutuk 1.332 kompostu hosi mane 601 no feto 701.
Nune’e mós totál profesór hamutuk 46, hosi númeru ne’e na’in-ualu (8) kontratadu no restante permanente hotu.
Jornalista : Sérgio da Cruz
Editór : Evaristo Soares Martins
