DILI, 11 november 2021 (TATOLI)–Governu Austrália liuhosi programa Partnership for Strengthening Village Development and Municipal Administration (PARTISIPA), iha kinta ne’e, asina nota entendimentu ho Bee Timor-Leste, Empreza Públika (BTL, E.P) hodi apoia fundu milliaun $4 hodi hadi’a sistema bee-moos rua iha munisípiu Dili.
Nota entendimentu ne’e asina hosi Emabaixadór Austrália ba Timor-Leste, Peter Roberts, Ministru Ministériu Obra Públika, Salvador Eugênio Soares dos Reis Pires, Prezidente Konsellu Administrasaun Autoridade Nasionál Agua no Saneamentu, Institutu Públiku (ANAS I.P), Domingos Pinto, inklui reprezentante hosi PARTISIPA no Engineering Without Borders (EWB).
“Doasaun ne’e atu hadi’a sistema bee-matan rua iha munisípiu Dili hanesan Tohu-metan no Lakoto Mutudare, ne’ebé hetan estragu hosi inundasaun ne’ebé akontese iha loron 04 abríl liubá,” Ministru Salvador Eugênio, hateten iha iha Otél Novo Turismo.
Notísia relevante: BTL,E.P kontinua halo melloramentu sistema bee-moos no saneamentu
Orsamentu ne’ebé Governu Austrália apoia, ba oin sei halo mitigasaun ba sistema bee-matan no halo identifika hodi hadi’a filafali hodi fornese ba komunidade iha Dili laran.
“Ha’u iha esperansa programa ne’e ba oin bele kontinua entre Timor-Leste no Austrália, tanba Governu Austrália hanesan parseiru ne’ebé boot tebes iha área infraestrutura bázika,” nia akresenta.
Aleinde ne’e, Governu Austrália liuhosi programa PARTISIPA prepara ona apoiu tékniku atu tulun BTL, E.P iha prosesu mitigasaun, tanba ne’e Governu espera kooperasaun entre nasaun rua ne’e sai di’ak liután hodi apoiu área sistema infraestrutura bázika iha Timor-Leste.
Nune’e mós, Embaixadór Austrália, Peter Roberts, hateten, apoiu ne’e hodi fornese bee-mos ba komunidade, liuliu ba vítima inundasaun sira iha sentru akollimentu.
“Antes ne’e ita hamutuk ho BTL, E.P no MOP apoiu bee-moos ba vítima inundasaun sira, maibé asina nota entendementu ohin ne’e ita sei servisu hamutuk ho BTL hodi reabilita sistema bee-moos,” nia informa.
Governu Austrália iha interese apoiu nafatin Governu Timor-Leste iha área infraestrutura bázika liuhosi programa Programa Nasionál Dezenvolvimentu Suku (PNDS) hodi investe iha suku, ne’ebé haree liu ba bee-moos.
Jornalista : Arminda Fonseca
Editora : Julia Chatarina
